AIM & ICQ: Wan en internet-dino stereft

AIM & ICQ: Wan en internet-dino stereft

Mä en nei juar anert ham ja wilems uk en betj wat. Miast jaft at nei gesetsen, of an tu’ns as’t oober uk ianfach en gud geleegenhaid, wat nei tu beganen – of wat tu aanj tu bringen. Tu aanj gingen as binai gans stal ian internet-siinst, wat was fölen faan döndiar lidj kään, diar föör 1990 bäären san: AIM – det AOL Instant Messenger. Iar at smartphones jeew an – tutmanst eranre ik mi so – uk iar lidj föl SMS skrewen haa, wiar messenger üüs AIM, ICQ, Windows Live Messenger an so widjer mä dön wichtigst komunikasjoons-netswerken.

At aanj faan AIM

Of jam det nü kään of ei, as nü uk ei so wichtig, auer at so of so föörbi as. AIM jaft at ei muar. Kurt för jul as’t bedriiw efter twuntig juar iinstääld wurden. Woorskiinelk hee’t ham ei muar luanet. Diarbi wiar AIM tu sin tidj temelk populäär, irgentwan wiar’t sogoor kompatiibel mä ICQ, auer bialen tu AOL hiard an so küd ham sin Buddy List, üüs det bi AIM het, mä ICQ kontakten apfal an de öler wai am an hed so ale kontakten tup. Ham küd mä jo messengern det du, wat ham daaling uk mä a messenger-apps üüs WhatsApp dee: noorachten skriiw, biljen stjüür, wilems sogoor uk uunrep of sogoor en video-tilefonaat maage, wan ham domools al en webcam hed. Bi mi wiar’t so, det wi de iarmade uun skuul wiar an de eftermade bi ICQ an AIM – fööraal uun a jonk tidjen faan’t juar.

Huaram san AIM an ICQ ei muar so populäär?

Also eentelk temelk so üüs daaling mä WhatsApp an jo öler messengern. Oober uk wan wi bi WhatsApp an jo öler siinsten jüst so komunisiire üüs bi AIM an ICQ domools, fraage ik mi, huaram AIM an ICQ ei muar brükt wurd. Irgentwan kaam Facebook, do kaam jo smartphones an diarefter WhatsApp. Irgenthuar diar tesken haa AIM, ICQ an jo ölern at ferpaaset, noch ens weler aptustunen. An so haa wi diar uk al lung ei muar iinluket. Of wan wiar jam tuletst diar iinlogd?

Wan wiar jam tuletst bi ICQ iinlogd?

Ik haa’t efter en lung pause för tau juar noch ens weler bi ICQ fersoocht, wat uuntesken tu det rüs internetkonsern Mail.ru hiart. Det wiar goor ei so lacht mi diar weler iintulogen, auer ik min paswurd ei muar wost an uk nian tilefoonnomer diar registriiret hed, ei wost, wat för en ual e-mail-adres jo faan mi haa an so widjer. Lokelkerwiis wost ik noch hög ual kontakten ütj min ICQ-list. Üüs ik det ales tupfingen haa, wiar diar tatsechelk noch hög lidj online, oober uk bluat trii faan auer honert ütj min ual ICQ-list. En freundin, wat mi gliks uunskrewen hee, määnd, det hat ekstra för en frinj bi ICQ blewen as, auer’s so doch of an tu’ns noch kontakt haa. Üüs ik das weg noch ens luket haa, haa’k sen, det hat sant april 2017 ei muar online wiar. Nü as neemen muar diar. Skriiw jam mi doch ens, ik san diar!

🇩🇪

Dass die Zeit niemals still steht und sich auch Internet-Urgesteine an den Rand der Bedeutungslosigkeit verabschieden, auch wenn sie zeitweise wie feste Institutionen wirkten, ist nicht neu. Sucht einfach bei Yahoo nach Myspace und StudiVZ. Tatsächlich dicht gemacht hat kurz vor Weihnachten aber AIM, der AOL Instant Messenger, der wie der große Kollege ICQ irgendwann mal richtig beliebt und praktisch für alltägliche Kommunikation war, ab den 2010er Jahren dann aber schnell an Bedeutung verloren hat.

Skriiw’em mi!

Übrigens, für AIM ist es zu spät, aber wenn ihr euer ICQ-Konto nochmal reaktivieren wollt, meldet euch doch. Meine Nummer kann ich immer noch auswendig: 138758517. Also, skriiw’em mi hal, ik san online!

2 Gedanken zu „AIM & ICQ: Wan en internet-dino stereft“

Kommentar verfassen