Dolores O’Riordan (†2018)

Dolores O’Riordan (†2018)
Bild: Alterna2Creative Commonsby 2.0via flickr

At jaft sok staken, huar ham wilems bi ferjat, huar’s eentelk faan kem. Of ferlicht hee’m det uk nimer wost. Diartu hiart was uk “Oh Happy Day”, wat föl lidj, tu’n bispal Elvis Presley, al süngen haa. Ferlicht wiar det stak oober nimer so bekäänd wurden, wan Edwin Hawkins det 1969 ei mä sin gospel-koor apnimen hed. Diarmä as hi definitiif det gospel one hit wonder wurden. Mundai as hi efter en kreeft-kraankels mä sjauer an sööwentig juar störwen. De salew dai as uk noch en öler persuun störwen, wat mä sin band uk fööraal för ian stak bekäänd wurden as, oober uk mä hög öler staken un a charts wiar.

Uun skuul skul’f irgentwan uun’t ingelsk-onerracht – ik witj ei muar, of det muar uun’t aachst of uun’t tjiinst klase wiar – en referoot auer ingelsk musiik maage. Ik wost, det ik hal auer The Cranberries snaake wul, auer ik domools det stak „Zombie“ gans gud foon, uk wan’t tu began faan a taudüüsender juar al en betj ääler wiar, auer ik foon, det at en super stak wiar, am’t krich uun Nuurdirlun tu tematisiiren. Ütj at referoot as niks wurden, auer nian tidj diarför wiar, oober at stak mei ik bit daaling, jüst so üüs det album „No Need to Argue“, huar at stak üüb wiar. Ik witj uk noch det ik temelk ferwonert wiar, üüs ik at domools keeft haa an a öler staken fölsis goorei so gratem an meechtig auer kaam üüs „Zombie“ – det fein „Ode to My Family“ tu’n bispal. Likes maad ik det album hal liis. Det musiik tesken rock, grunge an pop mä’t markant stem faan’t schonger Dolores O’Riordan wiar en spesjel an gud miks. Saner det stem wiar’t musiik was bluat hualew so spesjel weesen.

Uun a taudüüsender juar hee’t band en pause hed, huar uun Dolores O’Riordan aanj alben ütjden hee, iar’s band weler tup kimen as an ferleeden juar uk weler en album ütjden hee, huar föl staken üüb san, wat’s noch ens üüs unplugged-versjuun apnimen haa. Dolores O’Riordan wiar das weg uun London, am uun’t studio nei staken aptunemen. Spiitigerwiis as hat saner a apnaamen uftuslütjen de mundai mä bluat 46 juar störwen.

🇩🇪
Am Montag ist mit nur 46 Jahren Dolores O’Riordan mit nur 46 Jahren in London gestorben, wo sie für neue Musikaufnahmen im Studio war. Neben wenigen Soloaufnahmen kennt man sie vor allem als Sängerin der Cranberiies, die 1994 ihren Welthit „Zombie“ hatten.