Tu hiat: wan en heatmap tu föl fertäält


Am en auerblak tu haan, huar ham onerwais as an hü gau ham onerwais as, wan ham sport maaget, jaft at ja föl apps, wat ham diarbi halep kön. Gans föl brükt wurt diar „Strava“, wat sogoor en rocht sosjaal netswerk as, huar uun ham ferlike kön, huar öler lidj, wat det app uk brük, so onerwais san an hü gau’s san – of hoker ianfach best as. Auer a juaren san diar tjiin terabyte dooten tup kimen faan uun’t gehial 27 biljuun kilometern of – uun tidj ütjdrükt – 200000 juar sport. Oober at jaft en problem diarmä.

Hauke sin heatmap uun Kiel, so üüs at app "Bike Citzens" det ütjden hee
Hauke sin heatmap uun Kiel, so üüs at app „Bike Citzens“ det ütjden hee – nian hiamelkhaiden heer (app export)

Eentelk wiar diar iarst ens nian probleem, man bluat en fein teknisk amsaating faan a saamelt dooten – en so näämd heatmap nemelk. En heatmap as en koord, huar üüb uun warem klöören iinteekent wurt, huar ham spesjel dingen fölsis finj kön. Miast gungt at diarbi diar am, huar föl lidj san of huar ham föl lidj reer. Tu’n bispal jaft at det uk bi Snapchat, huar ham üüb at koord sä kön, huar föl snaps maaget wurden san, an uk bi det app Bike Citezens. Diar kön ham sä, huar föl lidj mä wel onerwais san an huar ham salew föl loongs keerd as. An so as det uk bi Strava, uk diar jaft at en heatmap, huar üüb iinteekent as, huar föl lidj onerwais san. Det as gans iindrüksfol, wan ham een det uunluket. An at kön uk praktisk wees, auer tu’n bispal so wel Strava üüs uk Bike Citezens stääden an gemianden mä hör dooten halep kön, am ferkiar an ferkiarswaier tu optimiiren. Det auerhood dooten saamelt wurt, det kön ham natüürelk salew enskias – diarmä det ham diarjin stemet, det a dooten brükt wurt of wan det ei gungt, diarmä, det ham det app goor ei brükt.

Huar as also nü det probleem?

So üüs at ütjschocht haa föl lidj jo diar nian toochter am maaget, üüs ham sant das wegaanj föl uun a netswerken lees kön. Noch ens – at jaft wörelk en mase materiool, wat Strava saamelt hee. So föl, det ham bal teenk küd, det ham faan neemen ütjfinj kön, wat ham för sport maaget hee, auer det so of so uun’t mase onergungt (of so skul det tutmanst wees, üüs Strava salew skraft: „Private activities are excluded outright[/]Activities are cropped to respect user defined privacy zones“). An hü det materiool visualisiiret as, as wörelk smok – üüb at website faan Strava kön ham ales beluke üüb en wäältkoord, huar ham uk widj iinzoome kön. Gans iindrüksfol as tu’n bispal detdiar stääd, huar arkes juar at Burning Man festival as, huar ham sä kön, hü at festivals-taarep apbaut as an wat jo lidj för waier gung, wan’s ale üüb a festival-plaats struume, auer föl lidj – so üüs at ütjschocht – ei bluat hör sport tracke, man uk hör arke dai aktivitäät.

At as oober ei bluat Burning Man

An det haa ei bluat jo beschükern faan’t Burning Man den, man uk soldooten. Wan’s sport maaget haa – an hög lidj uk wan’s ianfach so onerwais wiar. An auer’s so üüs at ütjschocht ei ufstääld haa, det arken hör aktivitäät sä kön, jaft at üüb’t wäältkoord faan Strava nü uk waier faan militär-laagern, wat eentelk neemen keen mut, auer’s gehiam san of so gehiam üüs mögelk bliiw skul. Üüb tiinsten üüs Google Maps san hög stääden wilems sensiiret of tutmanst ei so düüdelk tu sen. Man mäa dooten faan Strava wurt nü föl muar düüdelk. Diar troch, det ham üüb Strava sin heatmap a waier schocht, kön ham gau riad, huar tesken a waier woorskiinelk en hüs of en hial laager as.

Risikoo för soldooten an hör familjen

För’t militäär as det nü natüürelk en risikoo föör’t seekerhaid, uk wan a sääkerhaidtiinsten hör informasjuunen miast uk huar ölers fu an fölen at woorskiinelk al witj, huar laagern san, huar Eike Kühl bi ZEIT.de üüb henwiset. Grater küd at probleem för a soldooten an hör familjen oober wees, auer troch’t social network funksjuun sogoor mögelk as, eftertulukin, hoker jüst diar bi’t militär-laager sport maaget hee an wat at auer ham so üüb Facebook jaft (heise.de). Üüb’t Twitter-Account faan Tobias Schneider jaft at föl bispalen, huar wat troch a dooten faan Strava tu finjen as:

Skul do dach ales privoot bliiw?

Strava hee demonstriiret, hü ham föl dooten fein visualisiire kön an –woorskiinelk – en betj ünfreiwalig uk diarüüb henwiset, hü wichtig at wees kön, ham ens toochter diar am tu maagin, wat föör dooten ham widjer du kön an wat för dooten privoot bliiw skul. Ik hööbe bluat, det at diar troch nü nian auer-sensibiliseering jaft, auer de grünjtoocht ja eentelk gans gud as, am’t eeben infrastruktuur tu ferbeedrin.

Lees muar bi

  • Alex Hern: Fitness tracking app Strava gives away location of secret US army bases (The Guardian)
  • Martin Holland: Fitnesstracker: Strava-Aktivitätenkarte legt Militärbasen und Soldaten-Infos in aller Welt offen (heise.de)
  • Eike Kühl: Der Feind in meinem Turnschuh (ZEIT.de)
  • Drew Robb: The Global Heatmap, Now 6x Hotter (Strava blog)

🇩🇪

Strava bietet nicht nur eine App, mit der man sportliche Aktivitäten tracken kann, sondern visualisiert diese Daten, sofern man dem nicht widersprochen hat, auch auf der eigenen Website. Militärangehörigen könnte das nun zum Verhängnis werden, da offensichtlich viele von ihnen diese Funktionen – selbst dann, wenn sie keinen Sport mehr machen – nicht abgestellt haben. Datenanalysten haben bemerkt, dass sich so sogar von geheimen oder zumindest streng abgesicherten Militärstützpunkten Lagepläne ableiten lassen.

1 Gedanke zu „Tu hiat: wan en heatmap tu föl fertäält“

Kommentare sind geschlossen.