Hü’t autokeeren maner atraktiif maaget wurt

Hü’t autokeeren maner atraktiif maaget wurt

Wan ham een auerleit, det at wilems gonstiger as, mä auto tu keeren üüs mä bus of boon – sogoor wan ham det regelmiatig dee – do as det ja temelk nüürig. Imerhen as’t ja so, det mä muar autos uk muar ufgaase iin uun a loft kem an a stau üüb a struaten widjer tunamt. För’t seelskap an’t amwäält skul’t eentelk beeder wees, wan alternatiifen för’t auto gonstiger san üüs at auto salew.

Tatsechelk hee en onerschüking uk ütjfünjen, det a autoferkiar miast föl muar subvensjuuniaret wurt üüs ark öler ferkiarsmedel (Uni Kassel). Det det ei det efektiifst konsept as, am lidj diartu tu bringen, maner mä auto tu keeren of gliks goor nian auto to haan, diar auer wurt uun tidjen faan’t diesel-skandool an fol stääden ja uun’t uugenblak imer muar diskutiiret. At jaft uun’t uugenblak nemelk so föl autos üüs noch nimer uun Tjiisklun: 64 miljuun autos san uunmaldet (tagesschau).

Also – muar för a persuunennaiferkiar du?

Gans kurt as am gratis persuunennaiferkiar snaaket wurden, det wiar oober uk gau weler föörbi (taz). Ham hiart oober nü imer muar diarfaan, det begand wurt, at autokeeren ünatraktiifer tu maagin – wan’t al ei funksjuuniaret, det a persuunennaiferkiar atraktiifer wurt, as det ja uk en idee. (Wan jam mi persuunelk fraage, as det ei det best konsept, oober diar am gungt at nü jüst ei.)

Autos nem steed wech – an det koostet uk wat.

At lun Baden-Württemberg an en supermarkels uun Osnabrück haa tu’n bispal begand, muar jil för parkplaatsen tu nemen. Uun Baden-Württemberg wiar at tuföör gratis för lidj, wat bi’t lun werke, üüb a parkplaatsen tu parkin. Nü skal ham det anre (T Online). Bi det supermarkels uun Osnabrück mut lidj, wat diar äärne, widjerhen gratis parke, man lidj, wat diar bluat det auto ufstel wel, skel betaale – an det ei tu knaap: 20 Euro koostet det (iswaf, NOZ). An diarmä san wi uun en diskurs, wat sogoor uun en auto-frinjelk steed üüs Hamborig imer populäärer wurt: at jaft neen grünjrocht üüb en parkplaats (Hamburger Abendblatt). Uk det steed, huar lidj hör autos parke, koostet jil – fööraal wan ham beteenkt, det autos fölsis bluat ambi stun. Wan ik diaram teenk, det ik üüb en werkdai de hualew dai ei aran san an wat bi mi en quadraatmeeter faan’t wening koostet, do finj ik at bluat fair, wan uk en parkplaats betaalet wurt skal.

Saner det muar betaalet wurt, dee’t neemen siar – of ei?

Ham küd natüürelk sai, det det en gud wai as, autoferkiar jüürer tu maagin an so lidj muar faan’t auto iin uun öler ferkiarsmedeln tu fun. Of det nü parkplatsen san üüs boowen beskrewen of en City-Maut, huar ja uk imer muar am snaaket wurt (tu’n bispal för hög daar uun en SZ-komentar) – wi haa am sowat ja uk al snaaket. Likes küd uk en atraktiif naiferkiar föl beweege. A gonstig abo-prisen uun Wien wurt uun so en diskusjuun imer weler näämd (SZ) an wan ham am gratis naiferkiar snaaket, as imer Tallinn det bispal, huar at gratis naiferkiar so atraktiif wiar, det sogoor lidj, wat tuföör goorei mä auto of boon keerd san, man tu fut of mä wel onerwais wiar, uk mä naiferkiar keerd san (Spiegel Online). Auer en miks tesken atraktiif naiferkiar, ei bluat wat de pris uungungt, man uk hü gau an hü fol a busen an boonen san, diarauer snaaket uk Vancouver uun Kanada jüst, huarbi’s diar temelk gonstig prisen haa, man ei enooch kapasitääten (SZ). Woorskiinelk brük steeden uk so en miks faan muar jil, wat a autoferkiar betaalet an muar jil wat iin uun eeben persuunennaiferkiar komt. Bit nü as a autoferkiar finansjel imer temelk gud wechkimen. Uun Hamborig tu’n bispal san parktikets uun a letst 25 juar bluat am 6 % jüürer wurden, widjert en naiferkiarsabo am an bi 30 % muar koostet (inflasjuun mä iinreeknet; Nahverkehr Hamburg).

🇩🇪

Den Nahverkehr attraktiver zu machen ist in letzter Zeit nicht richtig voran gekommen – trotz Ideen wie kostenlosem ÖPNV und Umständen wie Dieselskandal, Rekordzahlen von KFZ-Zulassungen und Smog-Belastung in den Städten. Vereinzelt wird nun stattdessen begonnen, das immer noch verhältnismäßig sehr hoch bezuschusste Autofahren unattraktiver zu machen. In Baden-Württemberg werden die landeseigenen Parkplätze nun auch für Beschäftigte kostenpflichtig und ein Supermarkt in Osnabrück hat eingeführt, dass Leute, die dort nicht einkaufen, zukünftig 20 Euro Parkgebühr zahlen müssen. 

4 Gedanken zu „Hü’t autokeeren maner atraktiif maaget wurt“

Schreibe einen Kommentar

Details zur Verarbeitung deiner Daten bei einer Kommentarerstellung findest du in der Datenschutzerklärung (Abschnitt "Kommentare und Beiträge"). Die Angabe von Name und E-Mailadresse ist optional, es können auch Pseudonyme oder anonyme Kommentare hinterlassen werden.