Et huuwenhüüschen

Et huuwenhüüschen

Normoolerwiis as’t bi üs ja iarst ens nian kriteerium, det wat iin uun’t program komt, bluat auer’t irgenthü mä’t friisk spriik of nuurdfresklun tu dun hee. Wi du det likes wilems, tu’n bispal, am üüb en wedenskaplik projekt hentuwisen of wan irgentwan ianfach gud as. An diaram skul’f uk ens am’t nordfiisk teooter snaake, huar Mareike, Franziska an ik ferleeden freidai bi’t letst föörsteling faan „Et huuwenhüüschen“ wiar. Infos am’t stak finj’m üüb’t website faan’t nordfriisk teooter.

Iarst feer uun’t nordfriisk teooter

Wi haa det letst faan tau (eentelk skul’s trii wees) föörstelingen faan „Et huuwenhüüschen“ faan’t nordfriisk teooter besoocht. För mi wiar’t det iarst feer, det ik en stak faan’t nordfriisk teooter sen haa an ik skal sai, det ik det gans gud foon. Ik san normoolerwiis neen frinj faan laienteooter an miast uk ei faan a komöödisk staken, wat diar fölsis spelet wurd, man „Et huuwenhüüschen“ foon ik rocht gud. Det komt tu’n dial faan de profesjonel aptreed, wat detheer semiprofesjonel teooterskööl hee – so wel uun’t internet üüs uk bi’t föörsteling, man uk diarfaan, det’s uk temelk gud spele. Klaar, det diar bi’t schauspal an daans ei imer ales üüb huuchst profi-niveau as, oober jo haa doch likes ales temelk autentisk spelet an gud süngen. An jo wiar uk so profesjonel, det’s auer en letj teknisk probleem, en kurt ütfeelen mikrofoon, wechspele küd. Uk det stak wiar gans gud skrewen – wel nooch saner grat auerraskingen uun’t hanling, oober likes wiar det hial teooterstak frisker an beeder üüs so en ualen klamaukigen schwank. Bluat ian stak as mi nüürig apfäälen, auer mi ei so gans klaar wurden as, huaram so föl gewalt- an krichsspriik uun de tekst wees skul. Mareike ging det eenelk:

Dåt ma e krichspräke as me uk aapfeelen. Dåt wus jå for ålem önj iinj stuk, wan et me nuch rucht önj häi kamt. Deer hääw ik me uk frååged, weeram et nü am en armee gungt. Än ja hääwe deer uk sü snååked, dåt et en gou än en wörklik hiinj sid jeeft, sü en lait as e junk än häl sid bai Star Wars än da äädele ridere önj e tääle. Ouers hü ja deerbai en kåmp spaald hääwe, dåt såch wörklik gödj üt. Ik fün et kiiwenooch bloot en lait swåår tu gliker tid di takst tu leesen än aw e hoonling aw e spaalteele tu kiiken.

Naist feer üüb arke faal weler!

Uun’t gehial foon ik det rocht gud an wal diar naist feer weler hen – uk wan ik salew imer noch neen frinj faan komöödien san, oober alian diaram, auer at spoos maaget, tu belukin, hü det skööl ham salew an nuurdfresk laienteooter widjerbrangt an widjer profesjuunalisiaret. An det’s diar al en stak widjer kimen san, hee Franziska al faaststääld:

Ik wiar jaa al dit taust Lop bi en Apfööring fan’t Nordfriisk teooter. Dit jest wiar al gur, man ik skel sii, ja sen jit beeter uuren. Diarom hööpi ik uk, dat’s fiider maaki.

🇩🇪

Wir waren alle in der letzten Vorstellung vom Stück „Et huuwenhüüschen“ des Noordfriisk Teooter und sind ganz begeistert von der Performance der Theatergruppe, die zwar keine professionelle Gruppe ist, sich aber zunehmend weiterentwickelt und professionalisiert.