Nick Drake san 70. gebuursdai

Nick Drake san 70. gebuursdai

Das weg as de sööwentigst gebuursdai faan en konstler, wat tu sin aanj leewentstidj nimer so gans bekäänt wurden as – wat fölen goorei so rocht ferstun mei: Nick Drake. Hi as 1948 tu wäält kimen uun Birma üüs dring faan en britisk inschenöör, hee oober at miast tidj faan sin leewent uun Ingelun lewet, huar at familje tu began faan a föftiger juaren weler hen taanjen as. Sin aalern wiar bialen musikaalisk, so det Nick Drake faan jo uk en betj wat liard hee an föl lidj sai uk, det det leeder stiil faan Nick Drake sin musiik ham temelk efter det uunhiart, wat sin mam för musiik maaget hee. Aran hee hi al klaviar liard, uun skuul do uk widjer an diartu uk klarinet an saxofoon. Det skööl, wat hi uun sin skuultidj hed hee, as do uk muar iin uun a rachting faan rhythm and blues an jazz gingen, haa ik leesen. Sin solo musiik wiar do muar folkig. Chris de Burgh wul uk uun sin skuulband mäspele, moost oober ei, auer sin musiiksmaak tu popig wiar. Uun sin studientidj wiar hi en hualew juar uun Frankrik an hee uun Cambridge studiaret. Hi wiar was gud, hee oober muar üüb san rüm seeden, rikt, kifet an musiik hiard üüs mä öler lidj wat tup tu dun of sport tu maagin – wat hi uun sin skuultidj noch muar den hee.

Trii alben, wat at wäält hal liis mei

Nick Drake hee trii alben apnimen tesken 1969 an 1972 an föl lidj beiinfluset – tu’n bispal skal de nööm faan’t post-punk band The Cure üüb en stak faan ham turag gung, auer The Cure schongster Robert Smith Nick Drake so hal liis maad. Üüb det list faan a 500 best alben faan al tidjen ütj 2003 faan a Rollin Stone san ale alben faan Nick Drake listet an Musik faan ham hiart ham fölsis uun filmer an uk ens uun’t werbung. Det traurig saak as bluat, det hi det nimer mäfingen hee. Oober iar at diarmä widjer gungt, iarst ens en stak faan sin iarst album („Five Leaves Left“): „Cello Song“.

→ „Cello Song“ üüb Apple Music of Spotify uunhiar

Trii alben, wat knaap ei ferkeeft wurden san

Nick Drake as 1974 störwen mä bluat 26 juar. Hi hee en depresjuun hed an ham imer widjer turag taanjen uun a letst tau juaren faan sin leewent. Oober uk diarför stoon ham det depresjuun al uun a wai: tu’n bispal maad hi nimer so rocht üüb konserten gung an diar för a lidj snaake, uk hee hi bluat man interviews den. So wiar’t för’t label uk swaar, ham tu fermarktin. Faan a trii alben as tu detdiar tidj nian auer 5000 ferkeeft eksemplaren kimen. Uun a fiartig juar efter san duas san alianing uun Ingelun auer 2 miljuunen alben ferkeeft wurden. Üüb a iarst tau alben as’t musiik imer noch arangschiaret mä öler instrumenten, üüb at letst album „Pink Moon“, wat hi uun bluat tau naacht apnimen hee, jaft at bluat noch gitare an sin stem – uun’t titelstak uk noch en betj klavier. Uk üüb at tekst-eebene wort at jonker hen tu at letst album an ham täär goor ei föl interpretiare, det at mä ham imer widjer tu aanj gingen as. Of hi ham salew ambring wul of of det bluat en tragisk ünlok wiar, as ei gans klaar. Hi hee üüb arke faal tu föl medikamenten üüb ianmool nimen an as diarfaan störwen.

Faan en geheimtip tu en dial faan’t folk- an pop-kanon

Sin musiik hee ham suutjis faan en insider-tip tu rocht populäär musiik widjer entwikelt. Üüb arke faal as hi daaling föl muar bekäänd üüs tu det tidj, huar hi lewet hee. An ik mei sin musiik auermiatig hal. Hi hee klever apbaut songs, wat ei efter en ianfach pop- of folk-schema funksjoniare, en fein stem diartu an draft imer weler uf iin uun det melankolii. Sin mam hee auer ham saad, det hi a best staken uun a maarenstünjen maaget hee. An ik finj, det det musiik uk temelk gud tu a laacht maarenstünjen uun a somer paaset – fööraal, wan ham noch faan de dai tuföör wreeken as.

Noch en guden tip: „Family Tree“

At jaft ei bluat a trii studioalben faan Nick Drake, man uk hög compilations, tu’n bispal uk „Family Tree“, huar apnaamen faan aran üüb san an huar uk sin mam ens schongt. At as ei so gans gud apnimen, oober temelk intiim an warem mä föl cover staken uk diarbi. At jaft det album ei bi a streaming-tiinsten, oober wan jam det musiik faan Nick Drake liis mei, kön ik jam det bluat rekomendiare. Luke jam doch ens, of jam det ei irgenthuar kuupe kön. Ik haa’t üüs LP, at jaft oober uk downloads – bluat jüst nian stream.

Noch einmal kurz auf Deutsch

Diese Woche wäre der 70. Geburtstag von Nick Drake gewesen, einem britischen Liedermacher und Musiker, der leider viel zu jung gestorben ist. Sein tragischer Kampf mit seiner Depression und lässt sich in den wenigen Alben, die er in seinen 26 Jahren Lebenszeit rausgebracht hat, erahnen, machen sie aber in ihrer zunehmenden Zerbrechlichkeit und Melancholie auch sehr schön – insbesondere für helle Morgenstunden nach langen Sommernächten, wie ich finde.

Schreibe einen Kommentar

Details zur Verarbeitung deiner Daten bei einer Kommentarerstellung findest du in der Datenschutzerklärung (Abschnitt "Kommentare und Beiträge"). Die Angabe von Name und E-Mailadresse ist optional, es können auch Pseudonyme oder anonyme Kommentare hinterlassen werden.