Kategorien
Deutsch Sölring Wat en Leedji fortelt

Boomtown Rats – I don’t like Mondays

Hat wiar Mundai, di 29. Janewaari 1979, üs di 16-jaarig Brenda Spencer ön Kalifoornjen üt dit Hüs fan höör Aalern me en Bös üp di Skuul skuat, wat lik aurfuar lair. Di Skuullaiter en di Hüsmaister waar duar skööten, aacht Skuuljungen fan soks hentö twelev Jaar en en Skandārem waar mal blesiaret. Da forskanset höör Brenda stünenlung ön’t Hüs. En Skriiwer skel’s sair haa, dat’s iinfach niin Mondais mai. Jü wil Spaas haa. Di Bös her’s tö Jööl fan höör Faađer fingen.

Bob Geldof seet jüst bi en Bifraaging, üs’r fan di Amokloop jert. Dit reeget höm tö’t Leedji „I don’t like Mondays“ ön. Hat waar jit ditsalev Jaar 1979 en en Numer-1-Hit fuar sin Band „The Boomtown Rats“ ön Gurtbritanjen.

Dit Leedji fortelt fan en Daat, wat temelk lik es tö Brenda Spencer höör. En Faamen wel diarfuar sörigi, dat di Dai nemen tö Skuul gair. Höör Faađer ken’t ek forstuun, jü es dach sok en lef Faamen. Jü sair salev bluat, dat’s niin Mondais mai en diarom di hiili Wārel ofsjit wel.

Bi en üđer Stair staant en Naarichtenaparaat, wat di Lir fan dit Sjiten fortelt. En Mooter en en Faađer sen sjokiaret, biiđing teenk om jaar ain Faamen. Üp di Skuulplaats es nemen muar. Di Skuul es techt, man di Leks fan di Dai es, tö sterewin.

Brenda Spencer skul 25 Jaar tö Tochthüs. Dat’s jens sair heer „I don’t like Mondays“ ken’s ek muar om teenk. Jü sair, dat höör Faađer höör seksuel mesbrükt her en dat’s Droogen nomen her. Jü taacht, dat nemen höör haa wil, en wiar ofgönstig üp di üđer jung Lir. Muarlop forsaacht’s, jer üt Arest tö kumen. Man slaachet heer’s ek.

Brenda Spencer höör Amoklaap gelt ön di USA üs di jest Amoklaap bi en Skuul ön niier Tir, sent di Tir jaav’t hok üđern. Di Lir haneli diareeđer aaft lik. Skuulen me noch Jil röst āp: Metaldeetektooren, Kameras tö aurwaakin, Wachlir. Üđer Skuulen biwaapeni jaar Skuulmaisters en liir ja tö sjiten. Hat jeft Seekerhairsööwings, dat Skuuljungen en Skuulmaistern weet, wat’s bi en Amoklaap dö skel.

Üđer Lir wel streenger Waapengisetsen, dat Waapen ek muar sa leecht tö fon sen. Di jer President fan di USA Barack Obama forlangt eeđer en Amoklaap ön’t Jaar 2012, dat di Koopers fan Waapen streenger eeđerluket uur en wes Waapen forbēren uur. Man di Waapenlobi fan di USA wel Skandārmer me Waapen bi di Skuulen önstair.

Fuar maning Amerikaaners jert’t tö jaar Leewent, dat’s en Bös of en Pistool haa. Sa üs bi Brenda Spencer fo uk deling jit Jungen en Waapen tö Gibuurtsdai, wilems liir’s al, dit tö brüken, wan’s bluat trii Jaar ual sen.


„I don’t like Mondays“ von den Boomtown Rats aus dem Jahr 1979 erzählt von einer Schießerei auf eine Schule. Vorbild ist der Amoklauf von Brenda Spencer im selben Jahr in Kalifornien. An einem Montag schoss sie aus dem Haus ihrer Eltern auf das gegenüberliegende Schulgebäude, es gab Tote und Verletzte. Einem Journalisten soll sie als Grund gesagt haben: „Ich mag keine Montage“. Als Reaktion auf Amokläufe werden oft die Sicherheitsbestimmungen an Schulen verstärkt, einige fordern Waffenverbote, andere eine stärkere Bewaffnung. Für viele Amerikaner gehören Waffen zum Leben dazu.


Titelbild: Vwanweb, Creative Commonsby-sa 4.0 deed.en, via wikimedia commons