Kategorien
Fering/Öömrang

Emansipasjuun

De equal pay day as en dai, wat diarüüb henwiset, det wüfen bit tu dediar dai so tu saien gratis werke – wan ham ens efterreekent, hü föl jil maaner för det salew werk fu. Auer de dai jüst wiar an för tau weg diartu uk noch wäält-wüfen-dai, wul’f en betj diar am snaake, wat ales ring gungt uun üüs seelskap.

„Spitzenvater des Jahres“

Man ei bluat det. Hü kras det ünlikhaid strukturel uun’t seelskap feraankert as, wiset det, wat jüst pasiaret as an huar at uk föl kritik för jeew: de maan faan Insa Thiele-Eich (oha, dobelnööm!), det iarst tjiisk wüf, wat iin uun’t wäältal raise skal, hee en pris diarför fingen, det hi ian hial juar aalerntidj namt. De pris „Spitzenvater des Jahres“ jaft at arkes juar faan’t bekerei Meestemacher. Det probleem as: bi wüfen wurt at ianfach gans normool hennimen, det’s jo ian juar pause maage (an diar efter ferlicht sogoor goor ei weler hunert prosent widjer werke), wan en paar en letj feit. Det en maan nü en pris för wat feit, wat eentelk selbstferstentelk wees skul, as temelk nüürig. At NEON-redaksjuun hee hög iroonisk reaksjuunen ütj a social media diarüüb tupfaadet.

At bilj faan maaner an wüfen

Daaling kön’f miast al auer jo ual rolen-klischees laache, huarmä Dr. Oetker uun a föftiger juaren noch werbung maaget hee an a miast lidj sköde was uk mä’t hood am’t werbung faan „Frauengold“, wat uk ütj detdiar tidj komt. Alikewel jaft at imer noch föl stereotypen, wat reprodusiaret wurd. Tu’n bispal kluaser an speltjüch för dringer uun blä an föör foomnen uun rosa.

„Wääl dü uk soker?“ – „Naan, för a swet saagen san a wüfen tustendig“

Diar as’t bal nian woner, det a jongst (26 juar ual) CDU-maan uun a Bundestag, Philipp Amthor, so chauvinistisk snaaket, üüs wan hi jüst troch en tidjsleuf ütj a föftiger juaren iin uun üüs tidj kimen wiar. Det sitaat boowen hee en SPIEGEl-redaktöör apskrewen, wat hög daar mä Amthor onerwais wiar, üüs hi fraaget wurd, of hi uk soker iin uun san kofe haa wul.

Üüs tips

Wi haa üs gud uun rage snaaket an küd noch lung ei am ales snaake, haa oober hög aktuel tips, huar at ham luanet, uk noch ens iintulukin. Tu’n bispal de ferian Pinkstinks, wat ham fööraal jin seksismus uun’t werbung iinsaat. Gans aktuel – wat iarst ütjkimen as, efter wi at sending klaar hed –: at werbung faan’t Bundesferkiarsministeerium am wel-helmer.

An do jaft at noch de aktuel episood faan de Machiavelli-Podcast („Sexismus gegen Rap“), huar uun moderatoorin Salwa Houmsi tu beschük as an am seksismus, chauvinismus an haad jin wüfen uun’t hip-hop snaaket. Uk en gans wichtig teema, auer jüst hip-hop uun a uugenblak en temelk populäär genre as, wat mä sin teksten natüürelk uk föl jong lidj preege kön. Wüfen uun’t hip-hop as so of so imer so en saag, alian, auer wüfen uun det genre temelk onerrepresentiaret san. Salwa Houmsi hee do üüb Spotify en playlist tupstääld mä hör lefst wüfelk interpreeten.

Det feminismus ei bluat am wüfen gungt, man diar am, det ale lidj likeding föl wäärt san, wurt uk uun det deensk teooter-stak „Kvinder“ (21.03.–04.04.2019) faan Det lille Teater Flensborg klaar maaget, huar uun bekäänd klischees presentiaret an aprepen wurd, wat jin at ünlikhaid tu dun.

Eine Antwort auf „Emansipasjuun“

Kommentare sind geschlossen.