Kategorien
Deutsch Frasch Musik

Harry Belafonte tu san iirdäi

Di jarste marts wus di iirdäi foon Harry Belafonte. Dåtheer iir as et san näägentiste. Bekånd as’r as di „King of Calypso“. Di Noome füng’r döört album „Calypso“, wat 1952 ütköm. Dåtheer album häi oueremätje luk: et wörd ouer iinj milion tunge ferkååft. Hi seelew måå di noome „King of Calypso“ ai sü hål, ouerdåt‘r goorai sü maning Calypsos süngen heet.

Ouers Harry Belafonte as ai bloot en schungster. Hi as uk önj filme aptrin än heet en show ma e noome „Tonight with Belafonte“ mååged, weerönj et am suurt musiik önj Amerika gungt. Deerfor heet’r 1960 en Emmy füngen än wus di jarste suurte, wat diheere pris füng.

Deerbai engaschiirt Harry Belafonte ham uk sosjåål än poliitisch. Hi heet tut baispal deeriinj keemped, dåt suurte önj e USA diskriminiird wårde än wus en waane foon Martin Luther King. Hi stiped uk jü indiåånerbewääging. Ouers uk bütefor Amerika heet’r ham inseet, iinj e Apartheid önj sööderafrikåå än e Vietnamkrich. Bütedåt trätj Harry Belafonte for freese än iinj atoomkreeft ap. Uk diling as’r nuch aktiif än seet ham for bürgerruchte in. Önj e leeste detsämber heet’r tut baispal önj en önjspräke säid, dåt’m ham nütutids wider for bürgerruchte inseete schal, for Amerika as wider ordi rassistisch. Hi miinjd sügåår, eere as’r dåt bit heertu mabelaawed heet.

Madlertid schungt Harry Belafonte ai mör, ouers tu san iirdäi as en nai CD ütkiimen, ma e noome „When Colors come together“. Da stöögne deeraw heet’r seelew tuhuupestald. Dan årbed’r nuch bait projäkt „17“ ma. Dåt as en kurten film än en album, wat nuch ütkaame schan. Deerbai gungt et am di afroamerikaanische dring Jacobi Nelson, wat 17 iir üülj as än tut College gunge wal. Ouers dan heet’r probleeme ma e politii. Dåt gungt deeram, wat Rassismus ma e afroamerikaanische selschape önj e USA mååged.


Am 1. März hatte Harry Belafonte seinen 90. Geburtstag. Er ist bekannt als der „King of Calypso“. Er trat außerdem in Filmen auf und wurde für die Fernsehshow „Tonight with Belafonte“ als erster Schwarzer mit einem Emmy ausgezeichnet.

Harry Belafonte hat sich sehr stark politisch und sozial engagiert, zum Beispiel in der Bürgerrechtsbewegung, gegen den Vietnamkrieg, Apartheid und Atomkraft, und für den Frieden. Auch heute noch engagiert er sich dafür und ruft dazu auf, sich wieder für Bürgerrechte einzusetzen, da der Rassismus in Amerika wieder sehr stark sei. Außerdem arbeitet er an dem Film- und Musikprojekt „17“ mit, das zeigen soll, wie sich Rassismus auf die afroamerikanischen Gesellschaften in den USA auswirkt.

 

Eine Antwort auf „Harry Belafonte tu san iirdäi“

Kommentare sind geschlossen.