Kategorien
Fering/Öömrang Musik

France Gall († 2018)

Mä det nei juar tiket at tidj widjer an det bedüüdet spiitigerwiis uk, det lidj ääler wurd an irgentwan faan üs gung. Ferleeden söndai as at fransöösk sjongster Isabelle Geneviève Marie Anne Gall, beeder bekäänt üüs France Gall, mä sööwentig juar störwen. Uun Tjiisklun käänt ham fööraal det hit „Ella, elle l’a“ faan 1987.

Uun detdiar stiil hee hat al üüb det album „France Gall“ faan 1976 werket, wat det iarst album wiar, wat tup mä san maan Michel Berger enstenen as. Uun a 1960er juar hee hat föl mä Serge Gainsbourg werket, wat uk för hör iarst grat hits feroontwurtelk wiar, tu’n bispal för „Poupée de cire, poupée de son“, huarmä hat at Grand Prix Eurovision wonen hee.

France Gall bi't holunsk fernsee-sending "fenklup" 1968
France Gall bi’t holunsk fernsee-sending “fenklup” 1968 Bild: Beeld en Geluid, Creative Commonsby-nc-sa 3.0, via Beeld en Geluidwiki

För mi as France Gall hat fööraal intresant, auer hat tup mä schongstern üüs Françoise Hardy tu dön yéyé-schongstern hiart, also dönen, wat at beatmusik iin uun’t schlager broocht haa an diarmä en grünjstian för at modern popmusiik laanjen haa. Serge Gainsbourg hee föl yéyé-hits skrewen, France Gall wiar oober ei so tufrees mä ham, auer hat bi Gainsbourg föl üüb det seksualisiiret bilj faan en smok teenager stilisiiret wurden as, so üüs uun „Poupée de cire, poupée de son“ oober fööraal üüs uun „Les sucettes“, huar uun at eentelk am en loli gungt. Fölen interpretiire det oober föl muar üüs en oral-sex-metafer.

Efter at tidj mä Gainsbourg hee France Gall uun Tjiisklun tjiisk schlagern süngen, iar hat do mä Michel Berger tup werket hee. Efter „Ella, elle l’a“ jeew at bluat noch tau alben faan ham, det letst as 1996 ütjkimen. Diarefter hee’t temelk turagtaanjen lewet, bit hat nü efter en linger kreeft kraankels störwen as.

Noch einmal kurz auf Deutsch

Letzten Sonntag ist die Sängerin France Gall im Alter von 70 Jahren gestorben. Neben ihren Hits aus den späten 1970ern und 1980ern und ihrem Superhit „Ella, elle l’a“ ist sie vor allem als Yéyé-Künstlerin in den 1960ern mit Stücken von Serge Gainsbourg bekannt geworden. Von dessen sexualisierter Reduzierung auf das Bild der hübschen jungen Teenagerin hat sie sich allerdings bald emanzipiert und andere Wege eingeschlagen.


Ik persuunelk san en fan faan a yéyé-musiik, wan’t ei tu föl iin uun’t schlager-rachting gungt. En bispal, wat üüb arke faal ei diarhen gungt, as „Nefertiti“, huar mä Gainsbourg en stak skrewen hee, wat ham üüs ian faan a ääder wäältmusiik-staken uun’t popmusiik sä kön – uk wan diar weler föl mä klischees spelet wurt.


Bild: Beeld en Geluid, Creative Commonsby-nc-sa 3.0, via Beeld en Geluidwiki

Eine Antwort auf „France Gall († 2018)“

[…] faan sin jöögels tidj, wat at nü ei muar jaft: AIM. Diarfaan gingen as uk al en grat pop-star: France Gall as ferleeden wegaanj störwen. An apropos gingen, bi Wat en Leedji fortelt gungt at das weg am „Now that the […]

Kommentare sind geschlossen.