Wi haa das weg ei bluat föl nei musiik üüs jo staken faan Franz Ferdinand an Familjen uun üüs playlist, man uk hög musiik-tips för jam.
Noch muar nei musiik faan Beach House
För tau weg haa’k al am det nei single „Lemon Glow“ (Playlist #74) faan Beach House snaaket, wat üüb det naist album „7“ as, wat uun a mai ütjkomt. Jo letst tau studio-alben faan Beach House wiar efter min meening auerhood ei gud, man mä „Lemon Glow“ as Beach House weler diar, huar’s tuföör wiar – en klasisk stak för’t band. Nü as oober noch en nei stak ütjkimen, wat uk üüb’t naist album üüb as: „Dive“. Uk detdiar stak begant weler gans typisk, wurt do oober tu wat gans ölers an at luanet ham rocht woor, det ens uuntuhiaren.
Tour-tips
Ik hed mi ja frööget, hoker faan jam bi’t konsert faan King Gizzard and The Lizard Wizard tu sen, huar ik ja muar werbung för maaget haa üüs nuadig weesen wiar (tutmanst fu ik ja nian jil diarför). Det konsert wiar uk böös gud, temelk fein wiar diarbi uk det föör-band „Mild High Club“. Oober jo san nü weler wech an natüürelk jaft at uk noch öler bands, wat üüb tour kem. Üüb hör grat tour troch Tjiisklun san jüst Tocotronic, wat das wegaanj trii daar uun a rä uun Hamborig san (uk hiar luanet ham de föör-act Ilgen-Nur, wat jam uk ütj’t tjabelstünj-program keen).
Uk al muarsis hiard haa’m heer ferlicht musiik faan Sophia Kennedy, wat uk üüb Tour as an uk naist weg efter Hamborig komt.
An wan jam leewer en betj muar tidj haa wel am tu ploonin, do skriiw’em jam man de began faan a april iin uun a kalender. Diar san Lea Porcelain üüb tour troch Tjiisklun (10.04. Hamborig).
Algeerisk Tuareg-rock faan Imarhan
Uk üüb tour, man bluat kurt uun Tjiisklun: Imarhan. Ferleeden weg ging’t ja am nei musiik faan Seun Kuti, waastafrikannsk musiik mä rock an beat elementen diar uun an do haa’f uk gans kurt wat faan Tinariwen saad. Iin uun detdiar rochtang gungt uk det stiil faan Imarhan, huar wi al muarsis wat faan spelet haa heer bi tjabelstünj. Jo maage muar so en Tuareg-sound mä rock-elementen an jo haa uk en nei album ütjden: „Temet“.