Mä Marret & Hauke üüb’t suufa #016 faan a 12.06.20
Henwis: detheer episood haa’f leeder üüb’t website den üüs at tu’t iarst feer sendet wurden wiar. At as üüb dediar dai datiaret, huar at tuiarst üüb tu hiaren wiar.
Noch ens gungt at am rasismus. An üüs wi al ferleeden feer henwiset haa, kön wi bluat diar am snaake, hü at öler lidj gungt, auer wi priwiligiaret san an nian rasismus jin üs salew belewe. Likes as’t wichtig, det ham det aanj stelung reflektiaret an uk ens auerleit, huaram at üs beeder gung üs lidj mä en jonker hidjklöör üüs wi det haa. Huaram at wichtig as, diarüüb hentuwisen, det suart leewents respektiaret wurd skel („Black Lives Matter“). Wat ham salew jin arke dai rasismus du kön an hü ham een üüs witj mensk mä det beweeging solidarisiare kön an mut. Det haa uk Macklemore an Ryan Lewis maaget uun det stak White Privilege II. Wat genau diar mä maaget wurt an huarauer at uk kritik diarför jeew, diar snaake wi das weg am.
An do gungt at entelk uk ens weler am’t iidjen. Jam sä, onerskiaselker küd teemen uun ian episood knaap ei wees. Wan jam de letst muud am insekten-burgern noch ei mämaaget haa, do leet’m det man gliks. Wi haa wat neis för jam, huar mä jam al klaar san för de trends faan’t auernaist juar: röstet imenlarwen. Tutmanst jeew’t diar am en intresanten artiikel uun’t taz, huar uun beskrewen wurd, hü ünwichtig maanelk imenlarwen för imkern san, det’s oober likes uk gud smeek kön.
Of jam det smeekt of ei, musikaalisk haa’f dönheer staken üüb’t menüü, wat jam uk uun üüs suufa playlist üüb Apple Music an Spotify finj kön:
- To Kill A King – Graduate’s Escape
- Kodaline – Sometimes (Acoustic)
- Macklemore & Ryan Lewis featuring Jamila Woods – White Privilege II
- Robyn – Honey
- The Jesus & Mary Chain – Just Like Honey
- Woods – Where Do You Go When You Dream?