Tidjsleufen an gud „Tatort“-filmer

Tidjsleufen an gud „Tatort“-filmer

Uun det stak „Déjà-vu“ faan’t Antilopen-Gang üüb üüs playlist gungt det ei so gud för’t lyrisk ik, auer at faan en leewent fertäält, wat ei so gud an tufrees ütjschocht an huar uun ham de hiale skitj arke dai welerhaalet. At as en gans düüdelk reminesens üüb de film „Groundhog Day“/„Und täglich grüßt das Murmeltier“. Uun dediar film gungt at ja diar am, det en maan arke dai weler apwreekent an markt, det at desalew dai as, bit hi wat uun sin leewent anert an do entelk ales widjer gungt. Hi as so tu saien uun en tidjsleuf fangd.

At as goor ei so lacht mä a tidjraisen

Det mä’t tidjsleuf as goor ei so ianfach. At as teoreetisk mögelk, det at det jaft, oober det mensken rocht so troch’t tidj raise kön, det as temelk ünwoorskiinelk. Likes fasiniaret üs det imer weler an wi finj det teema aueraal, uun a uugenblak gliks uun tau intresant produksjuunen.

En film an en hiarspal diartu

Ferleeden wegaanj jeew at en Tatort-film, wat uk en grat reminesens üüb de „murmeltir dai“ wiar: „Murot und das Murmeltier“, huar uun komisar Murot muarsis duad gingen as, so lung, bit hi de faal aplias küd. An uk uun’t radio-wäält jeew at jüst wat diartu: sant janewoore jaft at uun’t Hörspielspeicher faan de WDR det hiarspal „Katastrophenschutz“, huar uun at am tau physikern uun en labor gungt, wat en tidjsleuf mäfu an jo det fraag stel: wan ham uun en tidjsleuf as an wodka drankt, wurt ham do imer muar besööben of drankt ham bluat imer muar wodka? Tatsechelk fu’s oober uk mä en grater problem tu dun.

An wan wi al diarbi san …

„Tatort“-filmer wurd ja oofting üüs ei so gud filmer apnimen – ober likes jaft at hög gud filmer diar mad. Föör fiiw juar, 2014, as de film „Im Schmerz geboren“ ütjkimen (uk mä Ulrich Tukur üüs komisar Murot), wat elementen ütj western-filmer, Shakespeare-tragöödien an en betj Quentin-Tarantino-stiil mikset hee an ei bluat efter min meening en guden film wurden as: de film hee uk hög prisen wonen. Uun a uugenblak jaft at det ei uun’t mediateek, oober at luanet ham, wan’t weler diar iin komt.

Wat jam oober bit mai noch uun’t mediateek finj kön, as „Meta“, uk en Tatort – das feer oober ütj Berlin mä Rubin an Krakow, spelet faan Meret Becker an Mark Waschke. De film as ei gans so auermiatig gud üüs „Im Schmerz geboren“, oober likes gud maaget – uk, auer hi en betj mä a tulukers spelet. An uk heer wurt – üüs uun „Murot und das Murmeltier“ en grat Hollywood-klasiker sitiaret an sogoor uk iinspelet: „Taxi Driver“.

1 Gedanke zu „Tidjsleufen an gud „Tatort“-filmer“

Schreibe einen Kommentar

Details zur Verarbeitung deiner Daten bei einer Kommentarerstellung findest du in der Datenschutzerklärung (Abschnitt "Kommentare und Beiträge"). Die Angabe von Name und E-Mailadresse ist optional, es können auch Pseudonyme oder anonyme Kommentare hinterlassen werden.