Äärnin saner kasen: tukonft faan’t supermarkels?

Ham kön’t so en betj beskriiw üüs de wai turag faan’t internet iin uun’t offline-wäält. 1994 jeew at det idee, uun’t internet en online buk hanel aptumaagin. Sant 1995 jaft at det oner amazon.com, daaling mä föl muar üüs bluat buken,  man sogoor mä frisk iidjwaaren. An – diar gungt at nü weler turag faan’t internet – sok iidjwaaren kön ham nü uk uun en rocht supermarkels uun Seattle kuupe, de nööm ’arfaan: „Amazon go“. En laaden uun’t offline-wäält as ei nei för Amazon, at jaft tu’n bispal uk al hög buklaaden. Oober hü det laaden organisiiret as, as temelk spesjel. At jaft nemelk nian kasen. Det slogan faan „Amazon go“ as: „No lines, no checkout“ – an so funksjoniiret at uk, üüs jo iarst testern beracht (recode, TechCrunch). Am uun det laaden tu äärnin brükt ham en Amazon-konto an det „Amazon go“-app. Wan ham iin uun det laaden gungt, skal’am en QR-code scane an kön do nem, wat ham brükt an weler ütjgung, betaalet wurt automatisk mä’t Amazon-account.

Hü as at mögelk, det ham uk bluat det betaalet, wat ham mänamt?

Oober hü funksjoniiret det? Uun’t laaden jaft at kameras, wat registriire, huar ham onerwais as an wat ham huar wechnamt. Diartu kem sensooren för’t gewicht uun a richen, wat mäfu, wan wat wechnimen wurt. An det skal temelk gud funksjoniire. Lidj haa fersoocht, tu testen, of det system at uk mefeit, wan ham wat klaut, oober at schocht so ütj, üüs wan at iarer ens malööret, det at system en stak ei registriiret üüs det at det, wat ham klaut, üüb arke faal ei mäfeit. Det küd uk en redaktöörin faan’t magasiin Technology Review bi at supermarkels faan’t start up „Standard Cognition“ uun Santa Clara (Kalifoornien) teste, wat mä en eenelk teknik werket üüs „Amazon go“ (Technology Review).

At idee as ei nei – at amsaating was

Det idee beeft at konsept as ei gans nei. Amazon hee uk al sant juaren am det konsept werket an wul eentelk uk al för en juar „Amazon go“ eeben maage. An wan ham ens huar öler hen luket, as at al lung ei muar standard, det ham bi en kasiirer betaalet, efter ham klaar as mä äärnin. Bi Apple tu’n bispal jaft at det uk al sant juaren (heer en 10 juar ual bidrach diartu bi Mac Life), dat at nian kasen jaft, oober ham bi jo mäwekern uun’t laaden betaalet of – det gungt do oober ei mä ales an ei aueraal – gliks üüb’t aanj smartphone (det skul diar was bluat mä ein iPhone gung…). An uk uun en „gewöönelk“ supermarkels üüs tu’n bispal Famila of Real kön ham heer bi üs ja al salew scane an det äärnin tu aanj bring – saner kasiirer, man ei saner kase. Man aueraal skal ham salew scane. „Standard Cognition“ an „Amazon Go“ bring det do widjer an maage at mögelk, det ham ianfach ales namt an at supermarkels det salew mäfeit, saner det ham wat scane skal. Bi „Standard Cognition“ skal’em det tu aanj noch preewe bi so wat üüs en kas, bi „Amazon Go“ oober gungt at gans saner kas.

Of ham det luanet, skel’f sä

Of det oober uk so föl brangt, üüb en kas tu fersichtin, det skel’f noch sä. Wan’t nooch lidj jaft, wat bi a kasen werke an lidj mä en app of en kontaktluas bankkoord gau betaale kön, do witj ik ei, of det ei bal likes so gau as üüs wan ham ianfach so ütjgungt. Uk Devin Coldewey, wat für TechCrunch testet hee, hü’t bi „Amazon Go“ so as, schocht at en betj kritisk:

What’s to gain? 20 or 30 seconds of your time back? Lack of convenience has hardly been a complaint for this market — it’s right there in the name: “convenience store.”
— Devin Coldewey för TechChrunch

Diartu komt natüürelk uk, det ham uun det looden at hiale tidj auerwachet wurt. Det mei was uk ei arken hal liis. „No lines, no checkout“ hiart ham üüb arke faal intresant uun, oober uunstun skul a lidj bi „Amazon go“ das weg likes – uk wan’t ei föör a kasen wiar, man föör’t laaden salew. Diar wul do nemelk doch tu föl lidj iin uun’t laaden.

I’m in Seattle and there is currently a line to shop at the grocery store whose entire premise is that you won’t have to wait in line. pic.twitter.com/fWr80A0ZPV

— Ryan Petersen (@typesfast) 22. Januar 2018

Noch einmal kurz auf Deutsch

Der Online-Handelsriese Amazon hat in Seattle mit „Amazon Go“ nun seinen ersten Supermarkt außerhalb des Internets eröffnet. Während es nicht unbedingt ungewöhnlich ist, ohne Kassierer*in einzukaufen, geht Amazon Go eine revolutionäre Stufe weiter und hat gar keine Kassen mehr. Das Versprechen, Kund*innen müssten nicht mehr in Schlangen warten, hat sich zur Eröffnung allerdings nicht erfüllt – zumindest am Eingang standen zeitweise viele Menschen an, die gerne in den Laden rein wollten.