Ik witj ei, wat jam den haa auer’t warem wegaanj – ik haa üüb arke faal föl fernseen luket, auer’t weler tidj wiar för de Eurovision Song Contest, detdiar grat show tesken pop, trash an komerts, wat eentelk goorei iin uun mi intresen paaset, mi oober likers arkes juar weler fastsiniaret. Diarauer haa’k mi uk das juar weler a bial semi-finaals an natüürelk uk det grat finaal uunluket. Ütj termiinteknisk grünjer das feer en betj trochenöler, neemelk iarst det naist an diarefter det iarst semi-finaal, wat oober goor ei so ferkiard wiar, auer ik so det best stak iarst tu aanj mäfingen haa.
Ik foon det stak, wat wonen hee, tatsechelk temelk gud
An det wiar för mi tatsechelk uk detdiar stak, wat tu aanj wonen hee: de „TOY“ faan Netta, de bidrach faan Israel, auer ik det stak wörelk gud maaget foon üüs pop-produksjuun. At wiar temelk dynaamisk, üüs ik finj gud schongen, at hee mä’t genderpolitisk iinhual en gud teema an en ferükt, oober gud maaget daans- an büünen-show.
A ringst staken
Gans ölers tu’n bispal üüs Spaanien, huar för mä Amaia y Alfred en jong paar üüb a büüne wiar, wat oober teemen an en show hed üüs wan’s tutmanst triisis so ual wiar. Of de bidrach faan Serbien, wat skiinboor irgenthü en ferbinjing tesken tradisjuun an moderne wees skul, oober muar tu en ring, mystisk kopii faan’t Safri Duo mä en clownesken druiid wurden as.
Uk gans fein: a bidracher faan Tschechien, Italien an – ens weler – Portugal
Diar wiar ik an a frinjer, huar mä ik det show luket haa, föl muar mä a staken faan Tschechien an Italien tufrees – oober uk faan ian stak, wat goor ei so föl ponkter fingen hee uun’t voting: detdiar faan Portugal. Det wiar en fein rauelk stak, wat goorei smeerig wiar an üüs en onerskias – uk ens en rauelk stak, huar uun at ei am liibe ging. Diaram wanske ik mi fö üüs playlist das weg natüürelk TOY faan Netta, det stak, wat wonen hee, man uk det portugeesk stak, wat föl tu kurt kimen as: „O Jardim“ faan Cláudia Pascoal.
Noch einmal kurz auf Deutsch
Fernsehintensive Tage standen bei mir trotz des guten Wetters an, weil mal wieder Eurovision Song Contest war. Ich weiß nicht, warum ich das eigentlich schaue, aber es ist doch immer wieder lustig. Und ich stand dieses Jahr absolut hinter dem Gewinnersong „TOY“ von Netta, den ich auch unbedingt auf unsere Playlist setzen will, genau wie den portugiesischen Beitrag „O Jardim“ von Cláudia Pascoal, der nach der Expert*innenmeinung unserer erfahrenen ESC-Runde am Wochenende viel zu kurz gekommen ist.