At konst as gud, oober a mensk diarbeeft en eers – wat nü?

Hü gungt’am mä’t werk faan konstlern am, wan a persuunen eentelk temelk dom san of wat rocht rings den haa? Diar haa’f ferleeden juar al am snaaket, üüs ham begaand hee, föl am seksuel masbrük uun Hollywood an at filmindustrii uun’t gehial tu snaakin, det so näämd me-too-enthalen. Ik finj ja, det ham persuun an werk nooch faan enöler dial mut. Likers as’t oober uk weler swaar, wan a konstlern do uk jil fertiine mä a werken.

Wan ik för musiik betaale, betaale ik för’t konst of för’t persuun, wat det konst maaget?

Kanye West tu’n bispal hee uun a ferleeden tau of trii weg föl dom kroom tjabelt, tu’n bispal det jo afro-amerikoonsk lidj, wat fersklaawet wurden san, det salew so wul. Diarmä hee hi ham absolut disqualifisiaret. Tu liker tidj hee hi oober uk en gans lastig dadaistisk stak ütbroocht. Diar uun jaft at tau minüten of so bluat hög samples tu hiaren, bit Kanye West irgentwan begant „The next verse/the next verse tho/…“ – det as ales an hiart ham temelk witsig uun an kön üüs werk uk beluanet wurt (uk wan’t nü wörelk niks grats an auermiatig guds as). Oober wan ik det streame of kuupe, do feit ja Kanye West jil faan mi – an wal ik det?

Spotify an öler streaming-tiinsten wel R. Kelly nü ei muar uun a playlisten haa

Bi Spotify (an uuntesken uk bi Apple Music) jaft at nü uun a kuratiirt playlisten nian musiik faan R. Kelly muar, auer hi uunklaaget wurt för’t masbrük faan hög lidj. Spotify wul’t so swaarer maage, det musiik faan ham tufalig streamet wurt. De streaming-tiinst as do oober uk salew kritisiaret wurden, auer föl öler lidj, wat för eenelk dingen uunklaaget wurd of uk ferklaaget wurden san, ei ütj a listen ferswinj.

Kritisk refleksjuun

För mi as’t gans klaar, det wan gewalt, (seksuel) masbrük an öler dom kroom an ferbreegen mä uun’t werk iingung of irgenthü en dial diarfaan san, det at diar üüb arke faal neen kompromis jaft an det hal diskreditiaret wurd kön. Ölers skul ham imer det perssun, wat at konst maaget faan det werk trene. Det as oober tatsechelk ei imer so lacht an so klaar uun en (pop-) kultüür, huar en det bilj faan en persuun dialwias ja uk en dial faan’t konstwerk uun’t gehial as. Ferlicht blaft at en guden kompromis, fööraal at konst uun fokus tu nemen an bi ark gelegenhaid a ring sidjen faan de mensk, wat det maaget hee, ei tu ferjiden, an kritisk tu reflektiaren, of det auerhood mä’t werk tuphinget an wan ja, hü’t do tuphinget.