Musiik uun’t internet: wat as mä a netlabels?

Wat as ütj a so näämd netlabels wurden, wat för am an bi tjiin juar temelk uun a muud wiar? Ferleeden weg as det nei album faan Entertainment for the Braindead ütjkimen, wat imer üüb ian faan min lefst netlabels ütjkimen as – das feer oober bi en gans klasisk label. Wat as diar luas?

Netlabels – wat wiar det noch gliks?

Föör am an bi tjiin jaur haa ik mäfüngen, dat’s jo jaft, jo netlabels. En netlabel as en miast letj musiik-label, wat ham, so üüs ham det käänt, diaram komert, musiik ütjtudun an ham am prese an konserten faan musiikern an musiksköölen komert. Diarbi gongt ales auer’t internet – an diar kön ham at musiik uk uunhiar an deellees. Miast as’t tutmanst so, auer föl netlabels mä so näämd Creative Commons lisensen werke, wat apkimen san, üüs en inisiatiif fersoocht hee, at copyright, at urheberrocht, för’t fernetset an digitalisiiret seelskaap uuntupaasin, diarmä konstlerisk werken uun’t internet dialt an widjerferwerket wurd kön. Ham kön mä jodiar lisensen efter’t prinsiip faan en baukast kombiniire, wat lidj mä’t werk du mut an wat ei.

So jaft at uk bi a netlabels imer gans onerskiaselk lisensen an en mase onerskiaselk musiik. Bi högen kön ham diartu ei bluat at musiik deellees, man uk jil du, wan ham seenkt, dat at musiik gud as – an wilems sogoor en CD of LP kuupe.

Eentelk ales gud – of ei?

Hiart ham ja gans gud uun, ales dial tu könen an soföl tu betaalen üüs ham jüst mei, ei? Oober luanet ham det uk of jaft at diar bluar ring musiik? Det komt natüürelk üüb at smaag uun, oober eentelk as för arken wat diarbi. Hoker at rauelk mei, mei ferlicht at musiik faan Entertainment for the Braindead, wat oner en Creative Commons BY-NC-SA lisens ütjkimen as an wat jam hir finj koon:

Muar jaft at bi Bandcamp.

Hü sjocht at oober daaling mä netlabels ütj? Ik sai at gliks: jo netlabels, wat ik ens hal maad, jaft at ei muar. Ik sä diar en mase grünjer föör: üüb at ian sidj as at för konstlern föl lachter wurden, auer websites üüs bandcamp jüst det tu dun, wat en netlabel iarer den hee för’t ferdialen an am ham tu fernetsen. Üüb at öler sidj as det, wat beeft en netlabel sted, oober niks üngewöönelkes muar: wan at bluat diaram gungt, musiik tu entdeken an niks diarför tu betaalin, huaram skul ham do uun tidjen faan Spotify an YouTube auerhood huarölers sjük, wan ham bi jodiar siinsten uk noch detdiar musiik feit, wat ham so of so hal mei.

Entertainment for the Braindead hee ferleeden weg en nei album ütjden. Ei üüs tuföör imer üüb en netlabel, man bi en klasisk label mä ales, wat diartu hiard. Diartu hee hat uk skrewen, wat a grünjer diarför wiar an diarbi as ian saak gans klaar: hat skal sin hüür betaale. An uk hat sait, dat at musiik-markels ham föranret hee an at rol, wat a netlabels ens hed, dat ham musiik uun’t internet beeder bikem kön, as nü föörbi.

A Netlabels san also temelk duad, likes blaft at linsenskonsept faan Creative Commons laben. An at idee diarbeeft uk. King Gizzard & The Lizard Wizard, wat temelk gud san an uk naist juar üüb tour efter Tjiisklun kem, haa tu’n bispal hör nei album komplet lisensfrei ütjden. Polygondwanaland as de nööm diarfaan. Eentelk wiar ploonet, dat jam det uk hir deellees kön, man diar maaget üüs system ei mä. Jam fu det album üüs MP3 an üüs WAV üübt at band sin website.

Gans duad san a netlabels oober noch ei – jam fu üüb netlabels.org en auersjocht, wat at so jaft (as oober uk muar gans aktuel) an at Free Music Archive saamelt föl faan’t netlabel musiik an hee sogoor en redaksjuun, wat diarauer skraft.

Noch einmal kurz auf Deutsch

Was ist aus den Netlabels geworden, die in den 2000er Jahren aufgekommen sind? Die Labels, die ich mochte, gibt es nicht mehr. Dass gerade letzte Woche die Künstlerin Entertainment for the Braindead ein Album auf einem konventionellen Label herausgegeben hat, zeigt – wie sie es selbst auch bemerkt – dass das Ideal, alle geben so viel Geld, wie sie wollen, doch nicht so gut funktioniert hat. Aber eine Vision der Netlabels ist auch schon wahr geworden, zumindest zu einem Teil: mit den Streaming-Plattformen gibt es mittlerweile viel Musik zum Durchstöbern und Anhören im Internet.

Und wer es sich leisten kann, veröffentlicht auch weiterhin lizenzfrei – wie King Gizzard & The Lizard Wizard ihre neueste Platte.

Beitrag (inkl. Beitrags-Audio) & Musik sind lizensiert unter einer Creative Commons Namensnennung – Nicht-kommerziell – Weitergabe unter gleichen Bedingungen 3.0 International Lizenz.