Kategorien
Fering/Öömrang Mä Marret & Hauke üüb’t suufa

Tesken a gud an a skrekelk saagen jaft at imer noch üüs suufa

Efter en letj paus, huar uun wi ei tup kimen san, jaft at entelk weler en stak snaak faan üüs suufas. An det as das feer tatsechelk goor ei imer so lacht an lastig, auer uk en mase luas wiar. Spiitigerwiis uk föl mä nazis.

Wan jam jam al fraaget haa, hü’s mä üüs hula-hoop challenge uuntesken ütjschocht, do harke jam woorskiinelk imer trau tu. Föl toonk üüb arke faal diarför! Das weg fu jam gliks tu began en letj update diar am.

A jonk sidjen

At gungt das weg oober fööraal uk am a jonk sidjen faan’t seelskap. Nazis san spiitigerwiis uun a uugenblak temelk präsent. An wan det ei ales nooch wiar, hee Marret sin saster letst uk noch en schört keeft, huar en skäält iinseid wiar, huar ianfach bluat „nazi“ üübstään. Det wiar woorskiinelk en gans dom tufaal, man irgenthü san tu föl nazis aueraal – ei bluat üüb demos, at jeew uk föl atentaaten uun a ferleeden tidj. So düüret de proses am’t atentaat üüb Walter Lübke imer noch uun an jüst as’t en hualew juar weesen, det uun Hanau en nazi-teror-anschlag wiar. Dediar traurig gedenkdai fäält tup mä en öler gedenkdai. A 22. august 1980 wiar uun Hamborig at iarst ferbrechen, wat uun’t Bundesrepublik Tjiisklun üüs nazi-atentaat iinordnet wurden as. Diarbi san uun en asyl-onerkemst tau lidj störwen, wat ütj Vietnam flüchtet san. Bit daaling wurt diar am eranert an uun’t taz küd’m för tau weg en fein interview mä a paaten fan a oofern lees (taz). Wat wi jam oober rocht hal tu harten lei mei, as en episood faan’t Podcast Rice and Shine, huar uun jam en rocht gud maaget an beracht uunhiar kön (Rice and Shine: Hamburg 1980: Als der rechte Terror wieder aufflammte).

A gud sidjen

Wi haa kön oober uk am hög fein saagen snaake. Hauke wiar tu’t iarst feer sant muuner weler üüb en konsert – oner string pandemii-aplaagen, man imerhen! Wi luke uk noch ens weler üüb Wizards Unite, huar wi uun tjabelstünj #141 al ens am snaaket haa, an beluke en stak ütj en genre, huar wi spiitigerwiis ölers goor ei so föl am snaake: hip hop.

Föör üüs playlist

Musiik, wat wi besnaake of ianfach ens widjerdu wel, finj jam uun üüs suufa playlist, wat wi üüb Apple Music an Spotify mä jam dial. Das weg nei diartu kimen:

  1. Sharon Van Etten – Senventeen
  2. How To Kill A King – Watchmaker (Demo)
  3. Zoon – Bleached Wavves
  4. Stella Sommer – Do You Still Love Me Now?
  5. Cardi B. feat. Megan Thee Stallion – WAP