Das juar as at adwent ja temelk leed kimen. Mi as det ei so wichtig, auer ik ei krastelk san an at jultidj för mi so of so iarst uun a desember begant. Jul mei ik nemelk likes gans hal liis, auer ik det steming ianfach gans fein finj. Aueraal san fein letj laachter an miast jaft at uk aueraal fein swet saaken tu iidjen. An diar jaft at noch wat, wat uun desember diartu hiart: at adwentskalender.
Ik haa nian adwentskalender aran
Ik skal oober sai, dat ik al sant juaren nian adwentskalender muar aran haa. Diarför haa’k oober högen uun’t internet, an det as bal tu en probleem wurden. Eentelk wul ik bluat bi hög gewinspalen mämaage, oober do san’s imer muar sidjen wurden, huar ik nü arke dai üüb luke. Ik wal ja nü nian werbung maage, diaram sai ik jam ianfach, at gungt so gud üüs aueraal. Of det nü en dediar supermarkels as, huar ham arkes feer tu eernin as, of en magasiin, wat ham nimer leest – arken hee en adwentskalender uun’t internet. An arken wal diarmä dooten saamle am werbung tu maagin – paase’m üüb, wat jam diar du! Mi as’t ianerlei, auer ik irgenthuar bit nü imer wonen haa (at as oober uk en mase, huar ik bi mämaage). At nerfet natüürelk, do efter jul ale newsletter weler uftumääldin, oober naist juar haa’k likewel noch ei so föl föör.
A best kalendern san miast bi a letj firmen
Ik san temelk tufrees mä jo kalendern faan a letj firmen. Ik witj ei, of ham diar beeder schangsen hee (auer ei so föl öler lidj mämaage) of of ik bluat föl lok hed haa – oober ik haa al bi en website faan de letj (green-) tee-hanel AIYA an bi’t naturkosmetik-firma Weleda wonen, tatsechelk oober uk bi en grater online-magasiin (bento). Wan jam jam uk noch en betj diarföör intresiire an nooch tidj haa för so en kroom of noch wat sjük, am beeder tu prokrastiniiren, do jaft at sidjen üüs adventskalender-gewinnspiele.de, huar üüb ham en mase kalendern fant, huar ham bi mämaage koon. Oober so en list as sogoor mi tuföl 😉
An diarmä det klaar as: wi haa hir niks mä a sidjen tu dun an skriiw’s hir bluat ap, auer wi am min adwentskalendern beracht wul.
Noch einmal kurz auf Deutsch
Ich liebe die Adventszeit, auch wenn ich mit der Kirche nichts am Hut habe. Vielleicht fällt es mir deswegen auch leicht, mich jeden Tag durch viele Online-Adventskalender zu klicken, um noch ein paar Weihnachtsgeschenke zu gewinnen. Wenn ihr auch noch einen Grund zum Prokrastinieren sucht, gebt euch der Datensammlung hin!