Jüst as di naie film „Alita: Battle Angel“ önj e kinos kiimen. Ik hääw’n ål sänj, än ik koon bloot seede: Dåt luunt ham wörklik. Di film as wörklik grutårti. Jü hoonling spaalt önjt 26. iirhunert, 300 iirnge eefter en gruten krich. Doktor Dyson Ido fant aw en schrottbunke di hood foon en cyborg än baget har wider tuhuupe. Di cyborg, wat nü di noome Alita feet, koon ouers ai deeram tånke, huum jü as än weer’s jurt kamt. Ouers jü koon oueremätje gödj keempe. Ma e tid fant Alita mör än mör ouer har üt. Ouers deer san uk manschne, wat har tuninte mååge wan.
Di film as wörklik grutårti mååged: huum schucht en stää, wat foon boowen irgendhü önjstöög ütschucht, deerouer swääwt süwat as en grut rümschap. Önj e stroote luupe manschne ma Cyber-proteese, unti uk fulstandie cyberman, tu’n diilj sü grut as en mansche unti gruter unti ma mör ärme än biine.
Dan jeeft et nuch en sport, Motorball, weer da diilnaamere aw rulschuur ma draaw döör en parkuur kääre än deerbai en bål foue wan. Ik foon dåt wörklik spektakuläär. Än bai dåtheer spal heet ham uk wiset, wat önj e film möre tooche forkamt. Irgendwan kamt en seeting, wat wörklik absurt önj jüheer situatjuun as. Tut baispal gungt en cyborg bait spal önjstöögne, än bloot nuch sin hood lait deer, än önj e näist moment wörd‘r as en bål wachschin. En lait makaber. Unti di doktor Ido kamt tu en slouerai än säit: „Wan jam ai deerma oufhüülje, repariir ik jam ai mör.“ Än snuublik san’s åle stal.
Ido wörd nuch tubai foon Christoph Waltz spaalt, wat ik wörklik gödj foon.
Ålsü: gunge jam åle fain önjt kiino, deerma et flicht nuch ein näisten diilj jeeft. Ik wörd et me wansche, än ouerdåt jü ferteeling ouer Alita en Manga-serie ma 9 diile as, as et uk lacht möölik.