Föl lidj fu arke dai seksistisk komentaaren uf – an fölen diarfaan san wüfen, diar arke dai beläästet wurd. För trii juar jeew’t diartu uun a sosjaal netswerken oner #aufschrei al en grat saamling, efter at journalistin Laura Himmelreich temelk chauvinistisk faan Rainer Brüderle behaanelt wurden as. Det aksjuun, wat fööraal faan Anne Wizorek inisjiiret wurden as, wiar gans gut, am lidj diarüüb hentuwisen, hü föl seksismus at arke dai jaft an hü fööraal wüfen diarmä konfrontiiret wurd, of eentelk arken, diar neen maan mä witj hidjklöör as (huarbi, wilems sogoor uk jodiar, sä ponkt 4 am’t „male model“ bi Wikipedia). Spiitigenooch wir det nian revolusjoon, lidj san widjerhen arke dai mä seksistisk spriak, aksjoonen an diskrimineering konfrontiiret. Diarauer walk ik jam en Instagram Account faan en jong wüf föörstel.
Aksjuunen jin catcalling
Hat het Noa Jansma an hee auer at tidj faan een muun saamelt, wat hör üüb a struat passiret auer hat muar üüs nooch diarfaan hee. Arkes feer, wan en maan hör uunmaaget hee, hee hat en selfie tup mä dediar maan maaget an at üüb Instragram stääld. Diar jaft at nü en en galerii faan föl maaner, huar faan en grat dial uk düüdelk ääler ütjsjocht üüs Noa Jansma. Diartu jaft at sitaaten, wat jo maaner tu hör saad haa. Sä kön jam det ales oner’t account @dearcatcallers.
Det Instagram-account as ei det iarst kreatiif projekt am’t so näämd catcalling (wan freem lidj üüb struat ham ianfach so uunmaage). Föör trii juar, 2014, jeew’t al en video am en wüf, wat tjiin stünj troch Manhattan uun New York lepen as. Tu tau minüten tup klapet san diar ale seenen uun, huar uun hat faan freem maaner uunsnaaket wurden wiar. Detdiar video, wat sant temelk genau trii juar online as, as bi YouTube al auer 45 miljuun feer uunluket wurden:
At jeew uk hög diskusjoonen am detdiar video an en swaar diarüüb ütj Auckland uun Neisialun, huaruun at so gud üüs nian catcalling jeew (Wikipedia) – man at video-projekt an at instagram-projekt wise doch, dat at uun föl steeden üüb a wäält imer noch föl tu föl seksismus an diskriminiiring jaft.
Parodiien an victim blaming
At diskusjoon am’t teema hee uk parodiien ütjbroocht, tu’n bispal en video, huar uun en wüf, wat cat calls feit, temelk gud swaaret an diarmä wiset, hü dom an plomp jo cat calls san (YouTube), likes oober mä en betj humoor uk klaar maaget, hü iarnst at teema as an fersjocht, üüb kampagnen jin beläästiging hentuwisen. Man at jaft uk videos üüs detdiar, huar uun en „skoonk“ wüf ambi gungt an goor niks pasiiret. Det wüf as natüürelk ei heselk, man drait bluat en betj slontig kluaser. Det video komt so mä det implisiit bööd, dat lidj saalew skilj san, wan’s uunmaaget wurd, auer’t diarüüb uunkomt, hü’s jo kluase. Det as, huar at so näämd victim blaming (Wikipedia) iinsaat – also dat jo oofern feroontwurtelk maaget wurd för det, wat jo malööret as. An det as jüst so dom üüs cat calling uk. Wan jam detdiar negatiif-bispal uk ens beluke wel, finj jam det uk bi YouTube.
Jetzt noch einmal kurz auf Deutsch