Pixels (2015)

Pixels (2015)
Bild: Randy LandichoCreative Commonsby 2.0 deed.envia wikimedia commons

Ik haa leest Sendai di Film „Pixels“ sen. Di kām 2015 ön’t Kiino en diar spöli tö Bispöl Adam Sandler, Kevin James en Peter Dinklage me. Di Film bigent 1982 bi en Arcade-Wārelsmaisterskep. Arcade-Spölen sen Videospölen, wat em sent di 1970er-Jaaren bi Automaaten ön Spölhalin spöli kür, tö Bispöl Pac-Man, Donkey Kong of Space Invaders. Ön di Film uur en Film fan’t Turniir ön’t Al stjüürt, üs en frinjelk Gröötnis tö di Bütenwārelers. Dum bluat, dat dānen dit üs en Krichsforklaaring se. Ön di Nütir grip ja di Wārel me Krichsmaskiinen ön, wat sa üs di ual Spölenütse en haneli. Alsoo ken bluat di Liren, wat ön di 1980ern üs Jungen Maisters ön di Spölen wiar, di Wārel reti. Dit jit, dat’s me Leechtkanuunen üp gigantisk blank Hönertbiinis fan’t Spöl „Centipede“ sjit, wat aur di Hyde Park ön London flö. Of ja forföligi me Autos Pac-Man ön New York. Da uur uk jit en Reertial üt jaar Jungenstir āpliiset en hat jeft natüürelk uk sawat üs en Leefdiforteling.

Di Film waar fan di Filmkritikers mal ring beuurdilet. Man ik fuan höm mal spaasig en kortwiilig. Fuar di Produktsjoonsfirma Columbia Pictures wiar’t ek sa wichtig, of alis histoorisk korekt es, hok Spölen, wat fuar kum, sen jest leeter öntstönen, di Grapen sen uk wilems jer plat üs waaraftig gur. Man likerst ken em di Film gur önluki. Di Efekten, hur di Arcade-Spölen me weeget uur, se mal gur üt. Di Spölen sen ön’t Originaal ön Pixeln, en se nur uk ön di Realiteet  sa üt, man tö liker Tir sen’s ön 3D. Dit neemt em da Voxel.

Alsoo, di Film luanet höm öntölukin, sa wel wan em di Spölen keent, man uk wan em dānen ek keent. Em mut niin huugdramātisk en komplisiaret Hanling forwachti, man fuar en fain ruuig Inj ken em di mal gur brük.

1 Gedanke zu „Pixels (2015)“

Schreibe einen Kommentar

Details zur Verarbeitung deiner Daten bei einer Kommentarerstellung findest du in der Datenschutzerklärung (Abschnitt "Kommentare und Beiträge"). Die Angabe von Name und E-Mailadresse ist optional, es können auch Pseudonyme oder anonyme Kommentare hinterlassen werden.