Kategorien
Deutsch Fering/Öömrang Sendung

Am gefüülen snaake

Am sport wut heer bi üs ja miast goor ei so föl snaaket. De letst bidrach ütj det rubriik wiar tu a olympisk wonterspalen uun Süüdkorea, wat uuntesken mä’t aanj faan a paralympisk wonterspalen uk föörbi san. An jüst so üüs det bi a olympisk spalen wiar, det troch’t konflikt tesken nuurd- an süüdkoreea sport an seelskap ferbünjen wiar, so haa’f uk heer en teema mä so en ferbinjing.

Jam haa’t woorskiinelk uuntesken ale mäfingen, wat at för en diskusjuun am Per Mertesacker an sin interwjuu mä’t Spiegel jewen hee. Diar uun hee hi fertääld, det hi föör arke futbaal-spal trochfaal hed hee an bit at luas ging reeket an wirigd hee – auer hi so föl stres hed hee. Hi hee föl komplimenten diarföör fingen, det hi so eeben an iarelk diarauer snaake maad – man hi as uk kritsiaret wurden: Lidj haa tu’n bispal saad, det Mertesacker ja uk ianfach hee aphual küden, wan hi det ei skaafet (FAZSZ1SZ2).

Wan maaner am gefüülen snaake …

Küd at wees, det’t ei bluat am profi-sport gungt, man föl muar diar am, det en maan am sin gefüülen snaaket an ei det bilj faan en maanelk, sportelk maskiin repräsentiaret? Ik liaw nooch. At jaft det ja aueraal, det lidj drük faan’t werk haa. Of det nü uun profi-sport as, uun’t management of uun en job, huar ham föl tu föl werke skal för föl tu man jil – aueraal kön lidj stres fu an am so muar ham so en stark image fertreed skal, am so muar as’t ei akseptiaret, det ham sok gefüülen hee. An wan ham det gans arkaisk schocht, do san det maaner, wat det fööraal bedraapt. det hee ham uk al en betj anret sant de futbaal-spaler Robert Enke ham efter en depresjuun ambroocht hee. Likes wise hög reaksjuunen am det interwjuu faan Mertesacker, det ham noch imer ei auer ales snaake kön üüs maan uun’t profi-sport.

Ei bluat uun Tjiisklun en probleem

Ik haa mi det nü ei wedenskaplik beluket, haa oober uun berachter am det Mertesacker-interwjuu uk leesen, det sportlidj ütj öler lunen nü uk began, diar am tu snaakin (sä de Marca-artiikel, wat boowen bi’t FAZ-bidrach ferlinket as). Likes haa ik de iindrük, det det nian typisk tjiisk fänomeen as, det lidj ei so föl am gefüülen snaake däär. At as aueraal ei so rocht akseptiaret, wan maaner of ianfach lidj, wat eentelk stark wees skel, am gefüülen snaake. Uun grat britanien jaft at uun’t uugenblak en aksjuun, huar uun at diar am gungt, maaner diartu tu bringen, muar am gefüülen tu snaakin (CALM). Diar maage uk bekäänd persuunen mä, tu’n bispal hee de musiiker Loyle Carner diarför en video mä san ual frinj – an ik liaw, hi as uk san produsent of sowat – apnimen, am am hör frinjskap tu snaakin:

An wat faan Loyle Carner tu hiaren jaft at uk uun üüs playlist.

Noch einmal kurz auf Deutsch

In einem Interview, das Profifußballer Per Mertesacker dem Spiegel gegeben hat, hat er von seinen Stressroutinen erzählt, die er vor jedem Fußballspiel durchlitten hat, woraufhin er viel Zustimmung erhalten hat, diesen Stress zum Thema zu machen, aber auch Kritik einstecken musste. Ich finde, es fehlt immer noch an Akzeptanz, dass Menschen, die besonders stark und kämpferisch dargestellt werden und sowieso auch Männer, Gefühle ausdrücken.  Im Vereinigten Königreich läuft dazu grad eine Kampagne, der sich auch der Musiker Loyle Carner angeschlossen hat. Was der seinem besten Freund zu sagen hat, hört ihr oben im Video.