Di däi foont hoolting

Di uurs as nü ål en grut teema än dåt håt, dåt da buume nü wider gräin wårde. Pååslik deertu wus di 21. marts di däi foont hoolting, wat et ål sunt e soowentier iirnge jeeft. Mååged heet‘n jü FAO, dåt as jü organisasjoon for neeren än loonbedrif foon e feriinde nasjoone, ouerdåt foole hooltinge tuninte mååged wörden.

Tu di däi jeeft et uk en websid, www.tag-des-waldes.de, weer’m ham ouert hoolting informiire koon. Deer jeeft et tips fort spånken önj e uurs, ålsü weer’m aw åchte schal. Dåt as tut baispal, wat for föögle unti insäkte nü wider deer san än wat for krüle än buume bloosme . Bütedåt jeeft et informasjoone ouer e PEFC-hooltinghoodstää, wat dåtheer iir Brilon as. Jü wårt eefter har engagement for e hoolting bestamd. Dan koon’m nuch ouer jü institusjoon PEFC (Programme for the Endorsement of Forest Certification Schemes) leese. Jü sat har for en klök njüten foont hoolting in, dåt’t sün blaft än ai ferswant. Deerfor jeeft et en sertifikaat for produkte, wat üt hoolt üt suk hooltinge mååged san, än for hooltinge, wat eefter e räigle foon e institusjoon hülen wårde.

Tjüschlönj hiirt nuch tubai tu e lönje önj e europääisch unioon, wat mååst hoolting hääwe. 70 % foon san hooltinge hääwe en üttiikning foon e PEFC unti en FSC-säägel (Forest Stewardship Council). Än da bünlönje, wat da mååste hooltinge hääwe, san Hessen än Rheinland-Pfalz.

Nuch mör informasjoone jeeft et, as ål säid, aw e websid tag-des-waldes.de. Än uk, wan di däi nü ål forbai as, lätj üs dåt wurmer wääder njüte än üt önjt hoolting unti önj e natör gunge.

Am 21. März war der Tag des Waldes, den es seit den 70er Jahren gibt. Die Internetseite www.tag-des-waldes.de informiert dazu ausführlich über den Wald und gibt Tipps für einen Frühlingsspaziergang im Wald. Außerdem berichtet sie von der PEFC-Waldhauptstadt des Jahres und von der Institution PEFC. Diese setzt sich für die nachhaltige Nutzung des Waldes ein und vergibt ein Zertifikat, das solche Wälder auszeichnet, sowie kennzeichnet Produkte aus nachhaltigem Anbau.