Kategorien
Deutsch Sölring Wat en Leedji fortelt

Höhner – Kumm loss mer fiere

Kumm loss mer fiere soong di Höhner 1991. Karniwal, dit es riin Früger aur’t Leewent, Sjungen, Daansin, Fiirin. Politiik spölet uk en Rol, wat ön’t Jaar sken es, uur diilwiis mal fuar Grapen brükt. Dit ken em mal gur se tö Bispöl bi di Ruusenmondaistoch ön Köln me sin Persiflage-Wainer. Man wat es, wan em jüst ek aural üp di Wārel bliir es? Mut em da likert fiiri? Dit skul di Naren 1991 aurlii. Di Irāk her Kuwait anektiaret, hat jaav Strir aur di Grens en fuaral aur Ööli. Hat liket, dat’t en Krich iiv skul.

Hentö Meren Janiwaari slaaget dit ek, di tö forhenerin. Di 17. Janiwaari 1991 bigent di Taust Golfkrich me Lochtöngripen fan en Koalitsjoon me 34 Lönen, önföört fan di USA. Ja maaket di Irāk sin Lochtofwiar tönönt, di Straaten, Bröchen en di Forsöriging me Weeter. Di siwiil Liren wiar swaar raaket diarfan. Di 24. Febriwaari kām da di Krich üp Grün diartö. Di Irāk skuat Rakeeten üp Israeel en Saudi-Arābien, man ön di Locht kür’s nönt töögen di Koalitsjoon maaki. Tö’t Jen fan Febriwaari toog di irākisk Soldaaten jam töbeek, di Irāk noom di Aneksjoon fan Kuwait töbeek en di 12. April jenicht di Krich da ofisjel.

Man skul em nü ön Dütsklön Karniwal fiiri, wan üđershur Bomben feel? Beeter ek, ment di Organisatooren. Diar waar aural di Omtochen ofsair, sa uk ön Köln. Hok Liren liiv, dat’t jit en üđer Grün jaav. Em wiar bang, dat diar bi di Golfkrich uk ön Dütsklön wat ske kür, dat’t Önslachen of sawat iiv kür. Di ‚Objektsjuts‘ waar forstarkt, man nü jaav’t ek noch Skandāremer, dat em uk jit en Karniwalsomtoch skuanigi kür.

Man sawat wil di Kölners ek haa. Di Wai fan di Omtoch döör di Stat wiar jaa bikeent, en sa toog di alternatiiv Karniwal me jen Wain luas, diar waar nü en Demonstratsjoon fuar Freer organisiaret. Di Mensken skul nü töögen di Krich döör di Straaten tii. En dit dör da uk sawat 3.000 Liren, sawel Demonstranten üs uk alternatiiv en traditsjonel Karnevalisten fan di Foriinings. Hen tö’t Jen fan di Omtoch wiar da sagaar 100.000 Mensken önerwai. Üs di Omtoch töjen wiar, soong da di Bläck Fööss jaar Leedji fan 1984 „Mir klääve am Lääve“, wi klüwi bi’t Leewent. Hat gair diarom, dat em döörhalt, uk wan di Omwārel forfület uur of āpröst uur en diar Konflikten sen. Likert skel em fiiđermaaki en jen aur’t Leewent frügi. En ön des Tir skreev da di Höhner jaar Leedji „Kumm loss mer fiere“. Jaa, diar wiar en Krich, man likert skel em fiiri, aur sa sair dit Leedji: Die Trone, die do laachs, musste nit kriesche. Di Tuaren, wat dü lachest, tört dü ek skruali. Jüst da, wan di Tiren ünseeker sen, es Früger aur’t Leewent wichtig, en dit ken nemen forber.

Di inofitsjel Omtoch fan 1991 her mal gur früchtet. Sent di Tir jeft’t di Söninj fuar Ruusenmondai langsen di sa neemt Spookentoch. Di es Demonstratsjoon en alternatiiv Karniwal, ön Junkens, en uur bluat me Jeften bitaalet.

_______________________________________________

Kumm loss mer fiere sangen 1991 die Höhner. Es geht darum, sich auch in unsicheren Zeiten die Lebensfreude nicht nehmen zu lassen. Das Lied entstand unter dem Eindruck des Zweiten Golfkriegs. Der Irak hatte Kuwait annektiert, eine Koalition von 34 Ländern unter Führung der USA schlossen sich gegen das Land zusammen. Aber soll man Karneval feiern, wenn anderswo Bomben fallen? Die Organisatoren der Karnevalsumzüge in Deutschland entschieden sich dagegen und sagten die Züge ab. In Köln zogen stattdessen Demonstranten und alternative Karnevalisten zusammen mit Vereinskarnevalisten bei einer Friedensdemonstration durch die Straßen. So entstand der Geisterzug, der seitdem am Samstag vor Rosenmontag abends durch Köln zieht.