Das weg as’t weler so widj – ferlicht wiar jam uk al diar, wan jam det heer lees – of jam intresiirt det ales goorei, det küd ja uk wees: at biiken. Biiken as ja imer üüb desalew dai, auer det mä en krastelk fest tuphinget. Ik wul mi diar ens en betj muar mä befaade, auer at diar so en stak faan Ra Ra Riot jaft, wat „St. Peter’s Day Festival“ het an ik haa toocht, det küd ham gud ens tu’t biiken heer bi üs uun’t program spele. Mi wiar diarbi uk klaar, det det niks mä’t biiken tu dun hee – Ra Ra Riot kem dach ütj New York. Diarauer wul ik wed, wat det do för en fest as, wat feiert wurt an mä a piadersdai tu dun hee.
At jaft muar üüs een dai för Petrus
Diarbi as ütjkimen, det ik wörelk niks mä sark tu dun haa – an iarst roch ei beskias witj. Uun’t stak faan Ra Ra Riot gungt at nemelk am en gans ölern piadersdai. Wost ik ja ei, det at diar muar üüs een faan jaft! Ja, bi de piadersdai gungt at am at fest „Kathedra Petri“, wat de dai wees skal, huar Petrus tu de apostelfürst neemd wurden as – wat uk imer det bedüüdet. De öler dai as uun a somer, de 29. jüüne, an as eentelk de rocht petridai. An so en somerdai hiart ham ja uk föl beeder uun för en fein festival – tutmanst as’t do heer ja imer en betj warmer. An was uk diar, huar at St. Peter’s Day Festival of St. Peter’s Fiesta as. Det wurt nemelk faan’t italjeensk-amerikoonsk gemeend uun Gloucester (Massachusetts) uun a USA feiert. Gloucester leit bi a sia, Petrus as patronus faan a faskern, also paaset det gud, diar arkes juar en fein fest tu maagin. An at hiart ham uk so uun, üüs ham een det teenkt, at jaft en markels en buatweedstridj – oober uk: at Greasy Pole contest.
Wat? Greasy Pole contest?
Bi’t Greasy Pole contest skal ham faan ian sidj tu en öler auer en twaalew meeter lung plank krep, wat 10 meeter huuch auer weeder aphinget as. At plank as diarbi iinsmeret mä feet faan bacon, tiarmer faan fask, ister faan restaurangs ütj at stääd an plantig braasfeet (of det uk irgentwat as, wat auerblewen as? Ual pomes-feet?). Was kön det gans witsig wees, wan hoker fersoocht diar auer tu krepen, man – iiiih! So föl onerskiaselk feet an uffaal ütj köögem! Det as üüb arke faal niks för vegetariern.
Üüb arke faal witj ik nü beskias, det at noch en ölern petridai jaft. Ik feier’s bialen oober lefst mä’t musiik faan Ra Ra Riot. Am’t tatsechelk fest gungt at diar uun nemelk goor ei. Lokelkerwiis.
Noch einmal kurz auf Deutsch
Eigentlich wollte ich diese Woche in der Sendung einfach nur „St. Peter’s Day Festival“ von Ra Ra Riot hören, weil der Titel vom Namen her so gut zum Petritag diese Woche passt, wegen dem ja auch das Biikebrennen stattfindet. Dabei habe ich dann aber festgestellt, dass es noch einen anderen Petritag gibt, der in diesem Song genannt wird. Und bei den Feierlichkeiten dazu kriechen Leute beim „Greasy Pole contest“ über eine Planke voll mit Schweineschmalz, Bacon-Fett, Fischgedärmen und Bratöl. Ich bleibe lieber bei der romantischen Idee eines schönen Frühsommerfestivals und höre „St. Peter’s Day Festival“ von Ra Ra Riot.
Titelbild: Aran Parillo, Creative Commonsby-nd 2.0, via flickr