Ufsküüwing efter föftig juar werk

Uun Grat Britanien jaft at uun a uugenblak en grat diskusjuun am migranten. Det as niks neis küd’m teenk, oober uun’t aktuel diskusjuun gungt at am at so näämd „Windrush Generation“. So wurd lidj näämd, wat uun a föftiger an söstiger juar faan’t twuntigst juarhonert efter’t ferianigt köningrik gingen san, auer’m diar – jüst so üüs ja uk uun Tjiisklun do en betj leeder – werklidj brükt hee. Jo miasten san domools faan Jamaika, Trinidad an Tobago kimen, lunen wat tu detdiar tidj tu Grat Britanien hiard haa, auer’s noch ei ünufhingig wiar. De nööm „Windrush Generation“ komt faan det buat, huarmä a iarst lidj uunraiset san. Kimen san do ei bluat woksen lidj, man uk familjen mä jongen. Auer dön lidj efter a krich mäwerket haa, Grat Britanien weler aptubauen, hee’m tu began faan a sööwentiger juar do saad, det ale lidj, wat uun det tidj kimen san, uk stootsbüürger faan Grat Britanien san.

Üüb ianmool san’s ilegal iinwaanerers

At probleem as nü oober, det neemen diarüüb aachtet hee, det ale dön lidj det uk üüs dokument fu an det tu began faan a 2010er juar a dokumenten am a iinraisen faan domools wechsmeden wurden san. An nü jaft at üüb ianmool en mase lidj, wat ufsköwen wurd skul, of irgenthuar hen turag skul, huar’s oober tatsechelk nimer so rocht wiar. Sant a imigrasjuunsgesetsen stringer wurden san, haa dön lidj at uk swaar bi a dochter of uun’t kraankenhüs, auer’s papiiren waant. Uun a letst tidj jeew at föl protesten, det so mä dönen an hör familjen amgingen wurt, wat at lun efter a krich grat maaget haa.

Efter föl protest schocht at nü beeder ütj

Das weg hee’t britisk regeering nü uunkaniget, det at en amnestii för dön lidj an uk öler lidj, wat uun detsalew tidj ütj öler ex-koloniien iinwaanret san. At skal jil jeew, am raisekosten weler ütjtugliken, wan lidj al ufsköwen wurden san an uk am öler dingen ütjtugliken. Üntufrees san fölen oober imer noch, auer’s jo imer noch ei iarenst nimen feel: det’s en amnestii fu, bedüüdet ja eentelk, det’s wat ferkiard den haa – oober jo an uk fölen faan’t britisk seelskap sä at skilj heer bi’t regeering.

Muar am’t teema finj’m heer:

• Windrush generation: Who are they and why are they facing problems? (BBC)
• Der Windrush-Skandal wirft Schatten auf die britische Einwanderungspolitik (DW)
• Windrush generation will get UK citizenship, says Amber Rudd (The Guardian)

Noch einmal kurz auf Deutsch

Anfang der 1970er Jahre wurde in Großbritannien beschlossen, dass Angehörige und Kinder der „Windrush Generation“ britische Staatsbürger sind. Diese Generation ist nach dem zweiten Weltkrieg und in den 50er- und 60er Jahren aus den damaligen karibischen Kolonien ins Land geholt worden, um einen Arbeitskräftemangel auszugleichen. Viele dieser Personen sind aber aktuell von Abschiebungen und sozialer Unterversorgung bedroht, da viele Ausweisdokumente nie ausgestellt wurden, die nach neuen Gesetzen aber zum Beispiel bei Arzt- und Krankenhausbesuchen vorgelegt werden müssen. Die Regierung hat inzwischen ausführliche Entschädigungen und Maßnahmen angekündigt, nicht zuletzt auch, weil der Protest in der britischen Gesellschaft ziemlich stark geworden ist gegen die Ausgrenzung dieser Menschen, die das Land wortwörtlich wieder mit aufgebaut haben.