Kategorien
Deutsch Sölring Wat en Leedji fortelt

Village People – Y.M.C.A.

It’s fun to stay at the Y.M.C.A.
You can get yourself clean,
You can have a good meal,
You can do whatever you feel.

Dit jert höm dach eeđer en gur Stair ön: Spaas, Baađirüm, wat tö iiten en Friihair. Me en apartig Noom: YMCA. Dit jit Young Men’s Christian Association, kristelk Foriining fan jung Mensken of kuurt CVJM. En sa jit uk dit bikeent Leedji fan di Village People üt’t Jaar 1978.

Dit fortelt fan en jung Mensk, wat jüst nii ön di Stat es en ünlekelk. Diar slair höm hoken fuar, tö di YMCA tö gungen. Diar jeft’t Iiten, Selskep en em wel höm seeker help. Hi skel bluat sin Stolthair aurwinj.

No man does it all by himself,
I said, young man, put your pride on the shelf
And just go there, to the Y.M.C.A.,
I’m sure they can help you today
.

Di YMCA of üp Dütsk CVJM jeft’t sent’t 19. Jaarhönert. Tö di Tir waar wilt di Industrialisiaring fuul Foriiningen grünlair, uk kristelken. Jir ön’t Religiöös wiar di Bigen. 1844 waar da ön London di jest YMCA grünlair, om jung Liren spirituel foorttöhelpen en wat om Hun tö dön. Ön di 1850ers kām höm dit Hiili da tö en Töhopslüting aur hiili Wārel. Diar heer Henry Dunant me tö dön, di heer uk dit Internatsjonaal Komitee fan’t Ruar Krüs grünlair.

Wilt di Taust Wārelskrich bisaacht hok Meaarbersters fan’t CVJM en fan’t Ruar Krüs di Fangenern ön Krichsfangenernlaagers. Dit Ruar Krüs kiirt höm da om materiel Saaken, en di CVJM luket eeđer di gaistig Töstant fan di Fangenern. Ja snaket me di Liren, maaket Kontakt tö jaar Familjin en bisöricht tö Bispöl wat tö Skriiwen of Sporttjüch. Dit skel di Fangenern aurdimaaten holpen haa.

Tö di Tir wiar di CVJM en Foriining bluat fuar Kārming. Ön hok Lönen kām da ain Wüfhaurforiiningen tö, nü tö Tirs ken Wüfhaur en Kārming Meföliger uur. Di Grünsats fan di CVJM en YMCA es, dat sin Aarber iipen es fuar arkenjen, saachtditsalev wat sin Ofstaming, Jil, Religjoon of seksuel Orientiaring es. Ja wel di jung Liren jaar Gaist, Lif en Siil foorthelp, dat ja jam gur kum en jaar Selskep beeter maaki ken. Diarfan fortelt di Sjungster ön’t Leedji.

Young Man, I was once in your shoes,
I said, I was down and out with the blues,
I felt, no man cared if I were alive,
I felt the whole world was so jive.
That’s when someone came up to me
And said young man take a walk up the street,
There’s a place there called the Y.M.C.A.,
They can start you back on your way.

En wichtig Diil fan’t Aarber es di Sport. Aur diarme starkt em uk jens Gaist. Bi di YMCA ön di USA sen sa Basketball en Volleyball tökemen. Üđer Fuaranstaltings sen fuar di Gaist salev, t. B. Maalkursen. Weđer üđer Kursen fortel di Liren wat aur HIV. Hat jeft Gasthüüsing, wat arkenjen hüür ken. Di Liren skel töhopkum en en gur Tir haa, sa üs dit Leedji sair.

Fan’t Leedji „Y.M.C.A.“ sair em, dat’t en Hümni fan di Sjwuulenbiweeging es. Of dit fan Bigen of ön di Taacht wiar, weet em ek seeker. Diar haa ek jens di Lermaaten fan di Band jen Meening tö. Man of’t nü me Wel wiar of ek, üp ark Fal es dit Leedji en gur Wārewin fuar di YMCA. En des Interpretatsjoon snaket uk ek töögen dit Konsept diarachter. Di Waalspröök es nemelk sent 1881: „dat ja ali jens sen.“

__________________________________________________

„Y.M.C.A.“ sangen die Village People 1978. Es beschreibt die Arbeit der YMCA, in Deutschland heißt sie CVJM. Diese Jugendorganisation hat sich aus dem Christlichen entwickelt, steht aber Menschen aller Konfessionen, Herkunft, Vermögen oder sexueller Orientierung offen. Sie will junge Menschen in ihrer Entwicklung fördern, damit sie die Gesellschaft verbessern können. Ein wichtiger Teil der Arbeit ist der Sport, im Umfeld der Organisation entstanden Basketball und Volleyball. Es gibt aber auch z. B. Malkurse oder Informationsveranstaltungen zu HIV. Das Lied „Y.M.C.A.“ gilt als Hymne der Schwulenbewegung. Ob das aber von Anfang an beabsichtigt war, ist nicht bekannt.