Kategorien
Deutsch Frasch Programm

Adwänt

We san jüst önj e adwäntstid. Deer jeeft et möre wise, tut baispal di adwäntskråns, di adwäntskaländer än besunere deege.

Di adwäntskråns kamt üt Hambörj. Sü ån heet di evangelische preester Johann Hinrich Wichern am en bai 1838 dåt jarst tooch önjt „Rauhe Haus“ mååged. Dåt wus en hüs for bjarne än junge manschne, wat wiisbjarne unti hüswil wjarn. Di kråns schölj ljåcht önj e junk tid bränge. Hi häi jütid nuch 24 striinjåchte än wus suner tanetweege. As’r dan foon e boower- än madellååge ouernümen wörd, nümen da manschne bloot nuch  fjouer striinjåchte for da saandie. Di wise jäif et dan jarst önj e protestantische gebiite önj nordtjüschlönj. 1925 schal et dåt jarst tooch en kråns önj en katoulsch schörk jääwen heewe. Än eefter e tweede wråålskrich jäif et ham uk önj e katoulsche gebiite önjt sööden.

Di jarste adwäntskråns hiirt ham je as en adwäntskaländer önj. Man fort teelen foon e deege bit jül jäif et maning möölikhäide: kaländere tut oufriwen, striinjåchte, wat mårked wjarn, klooke än krittoofele. Mån di jarste kaländer, wat drüked wus, as foon 1908. Hi wörd foon en Verleger üt München mååged. Bit önj e 20er iirnge as’r dan bekånd wörden. Än diling jaft et je uk nuch maning forme, tut baispal kaländere ma bile, schokeloode unti ma  spalkrååm, ouers uk äinmåågede.

Wilert e adwäntstid jeeft et dan nuch en påår bekånde deege, tut baispal di 4., 6., än 13. detsämber.

Di 4. detsämber as di däi foon e hili Barbara. Deer snast’m tweege foon fruchtbuume än stalt ja önj wurm wååder.  Tu jül schal’r dan bloosme. Dåt schal luk fort näist iir unti en gou beerid bedüüde. Diheere wise kamt foon e hili Barbara. Jü schal aw e wäi önjt luch en twich foon en kasebai manümen än önj wååder stald heewe. Hi heet bloosmed, as jü tu düüs feruurdiiljd wörd. Önjt 18. iirhunert wus di wise ferbin, ouerdåt da manschne da tweege üt tööninge än hufe stäljen. Di 6. detsämber as natörlik Nikolaus, weer’m wat önj e stäiwle fäit. Sunt di 15. iirhunert jeeft et di wise, dåt’m wat önj e nåcht tu diheere däi schångd fäit. Di Nikolaus schal aw twäär manschne tubääggunge: di Bischof Nikolaos foon Myra (laawet tut iinje foont 3. iirhunert) än di Abt Nikolaus foon Sion, Bischof foon Pinora (laawet trinam 550). Än di 13. as di däi for Lucia, wat et for ålem önj

Skandinavien jeeft. Deer gunge bjarne ma jåchtkrööne döört hüs än mååge jü famiilie wiiken. Önj diheere däi wårt Lucia feriirt. Jü wälj önjt 4. iirhunert ai ma en moon befraie, wat nån krast wus, än wörd deeram düüdjmååged.

En ouderen wise, wat nuch intresant as, jeeft et diling knååpenooch nuch. Deertu wårt am e jarste saandi önj e adwänt jü kreeb apstald. Da bjarne mönje dan huulme deerönj leede, wan ja ja gödj ferhülen heewe, tut baispal wan ja gödj önjt schölj wjarn unti önjt hüs mahülpen heewe. Bit jül wus jü kreeb dan beest ful ma strai.


Die Adventszeit hat ihre eigenen Bräuche, wie Adventskranz und Adventskalender, und besondere Tage. Den ersten Adventskranz stellte ein evangelischer Pastor in Hamburg um 1838 für die Kinder und Jugendlichen eines Ausbildungshauses her. Danach

verbreitete er sich, bis er nach dem zweiten Weltkrieg bis in die südlichen katholischen Gebiete gekommen war. Der erste gedruckte Adventskalender entstand 1908 in München. Zuvor gab es bereits andere Arten von Kalender, wie z.B. Kerzen mit Markierungen, Tafeln und Abreißkalender.

In der Adventszeit werden noch weitere Tage gefeiert, wie der Barbara-Tag, an dem Obstzweige in Wasser gestellt werden und die dann bis Weihnachten blühen. Dann gibt es noch den Nikolaustag am 6. Dezember und den Lucia-Tag am 13., an dem Kinder mit Lichterkronen durchs Haus ziehen.

Und dann gab es noch den Brauch, dass Kinder für gute Taten Stroh in die Krippe legten und sie so bis Weihnachten füllten.