Kategorien
Deutsch Frasch Musik

Comedian Harmonists

Di 22. februar 1935 füngen tra lasmoote foon e bekånde floose Comedian Harmonists jü tising, dåt ja önj e „Reichsmusikkammer“ apnümen wörden. Da oudere tra lasmoote wörden ai apnümen, ouerdåt ja ai „arisch“ wjarn. Bål deeraw gäng di floose ütenouder.

Huum heet di noome Comedian Harmonists wälj ål iinjsen hiird. Ouer huum wus dåt eentlik? Dåt swåår as: en A-Capella-floose ma en klawiirspaaler. Ja süngen äine kompositschoone än for ålem amschraawen stöögne üt e jazzmusiik, film, schlager, följkstöögne än uk en påår klasische stöögne. Jare tächnik håt Close-Harmony. Dåt håt, dåt da harmoniie üt toone bestönje, wat nåår baienouder lade. Da aptreese wjarn ai ålwri. Da schungstere måågeden jukse, deerdöör, hü ja kiikeden än ja bewäägeden. Uk maning stöögne san lusti. Maning san diling nuch ordi bekånd, tut baispal „Mein kleiner grüner Kaktus“, “Veronika, der Lenz ist da“ än „Wochenend und Sonnenschein“. Ouers oudere wjarn uk sani unti en lait truuri.

Önjtstiinjen as di floose 1927, jütid ma di noome „Melodie Makers“. Iinj iir lääser köm dan di noome „Comedian Harmonists“. Da lasmoote wjarn Ari Leschnikoff, Walter Nußbaum, wat bål deeraw foon Erich A. Collin erseet wörd, Harry Frommermann, Roman Cycowski, Robert Biberti än Erwin Bootz.

Önjfångs trätjen ja önj Cafés ap, önj en Revue, önj nåchtclubs än bai feeste. Nüügentäinhunert nüügenäntwunti jäif et dan uk jü jarst spaalplååt än di jarste apträäs önjt råådio. Deereefter kömen solo-konsärte, en turnee döör tjüschlönj än tuleest uk apträäse önjt bütenlönj än önj filme

1932 wjarn da Comedian Harmonists aw e kröön foon jare luk. Ja fertiinden ma jare aptreese än spaalplååte maning giilj. Ouers ja hiirden ål antisemitisch snååk, ouerdåt tra lasmoote jööse unti üt en jöösisch familii wjarn. Rucht swiir wörd et dan 1933. Dåt jäif widere konsärte, ouers ja wörden tudiiljs uk oufsäid. Huum säid, dåt jare noome tjüsch weese schölj, dåt jäif manschne, wat önj e konsärte deertwasche biiljkeden, dåt musiikprogram wörd kritisiird, ouerdåt et tu en grut diilj üt musiik foon jöösische komponiste unti takstschriwstere bestöö. Tuleest mönje ja uk ai mör önj filme maspaale.

Widere probleme jäif et dan ouer e „Erste Durchführungsverordnung zum Reichskulturkammergesetz“. Jü köö künstlere jare beruuf ferbiidje, wan ja as ai eegned sänj wörden. Da Comedian Harmonists wörden deeram tubäägwised, ouerdåt tra lasmoote as ai arisch jülden. Önj e marts 1934 trätjen ja dan dåt leest tooch önj tjüschlönj ap, deereefter bloot nuch önjt bütenlönj. Jü Reichsmusikkammer nüm tuleest da tra  lasmoote ap, wat as „arisch“ jülden. Ma en naien, tjüschen noome muursten’s suner jare koleege wider aptreese. Deeraw diiljden da Comedian Harmonists ja ap. Önj tjüschlönj jäif et nü „Das Meistersextett“, önjt bütenlönj trätjen da oudere as „Comedy Harmonists“ ap. Daheere floose häin ouers ai sü foole luk än ja schååsen ja biise 1941. Ouers wat huum besuners hööge koon as, dåt åle lasmoote di Nationalsozialismus än di tweede wråålskrich ouerlaawed hääwe.


Am 22. Februar 1935 bekamen drei Mitglieder der Comedian Harmonists die Mitteilung, dass sie in die Reichsmusikkammer aufgenommen wurden, während  es bei den drei anderen nicht der Fall war. Sie waren nämlich Juden oder stammten aus jüdischen Familien und galten damit nicht als arisch.

Die Comedian Harmonists waren eine A-Capella-Gruppe mit Klavierbegleitung. Sie waren sehr erfolgreich, besonders im Jahre 1933. In diesem Jahr begannen aber auch die Probleme. Sie wurden kritisiert wegen des englischen Namens und ihrer Mitglieder. Ebenso wurde das Programm abgelehnt, da es zum großen Teil von jüdischen Komponisten oder Textern stammte. Konzerte wurden abgesagt und die Mitwirkung an Filmen verboten. Nachdem die Comedian Harmonists zuerst von der Reichsmusikkammer abgelehnt wurde, traten sie seit 1934 nicht mehr in Deutschland auf. Als dann drei Mitglieder doch aufgenommen wurden, aber nicht mehr mit ihren Kollegen auftreten durften, löste sich die Gruppe 1935 auf. Die zwei Nachfolgergruppen „Das Meistersextett“ und die „Comedy Harmonists“ hielten sich nur bis 1941 und erreichten nicht den gleichen Erfolg.

Eine Antwort auf „Comedian Harmonists“

Kommentare sind geschlossen.