Wat jo parteien tu ferkiar & mobilitäät sai (1)

Wi san maden uun’t superwooljuar 2017. Naist muun woort uun Sleeswig-Holstian an NRW ufstemet, uun at Saarlun wiar’t wool al. Wi began diaram daalang mä en seerie uun üüs rubrik ferkiar & mobilitäät an luke ens, wat jo parteien so föör haa för ferkiar an’t mobil leewent.

Uun dial 1 gongt at luas mä at CDU an at SPD. Uun dial 2, 3 an 4 kem jo öler parteien, wat uun a lundai faan Sleeswig-Holstian san of wat en schangs haa, diar iin tu kemin.

Ik haa mi a programen uunluket. Diarbi haa ik ei arke letj ponkt jinauer stääld, man diarüüb luket, huar bi jo parteien a fokus leit. Auer uk, wan en partei waarskiinelk ei ales amsaat koon, wat at ham föörnamt, sjocht ham doch, wat muar uun a madelponkt stäänt.

Wat as at gratst onerskias tesken at program för ferkair an mobilitäät bi CDU an SPD? So üüs jo de fokus lei, sä ik en graten onerskias bi a struaten an a auto- an lastwaanj-ferkiar.
At CDU as de motorisiiret ferkiar üüb a struaten temelk wichtig. Autoboon-ütjbau, amgeeungsstruaten an reparatüüren wurd diar näämd – an diar skal föl investiiret woort. Investiire wal at SPD uk uun a reparatüüren faan ual struaten, oober ei so föl nei bau. Bi’t SPD leit at fokus muar üüb at ÖPNV, also fööraal bus- an boonferkiar. Bi’t boon wal at SPD uk diar nei bedriiw-teknik fördere, huar nü diisel-tsuchen keer.
Bialen wel oober uk jo regjoonen üüb’t lun beeder uunbinj tu a stääden. Diarbi dremt at SPD en ebtj faan nei fernetset teknik, am waanjer, taxis of busen tu repen, so en betj üüs UBER, widjert at CDU faan konventionel modeln üüs rep-busen snaaket.

Bi’t hial teema ferkair as’t CDU temelk struat-fiksiiret. Tu a wel-ferkiar fant ham uun’t program diar muar, huar’t am turismus gongt, üüs diar, huar’t am arke dai ferkiar gong. At SPD hee uk ei föl diartu, skraft oober tumanst, dat ham uk jo waier saniire wal an dat ham föl mögelkhaiden skaafe wal, am welferkiar mä ÖPNV tu ferbinjen. Bialen wel ham för „Radschnellwege“ iinsaat, oober dat as aktuel so of so en populäär teema.

Tu en mobil seelskaap an tu en mobil leewent hiart oober uk en digital infrastruktuur, diarmä jo lidj fernetset of uk mobil werke kön an diarmä modern fernetset teknik funksjoniiret. Gau internet, wat mä föl dooten amgung koon an gud ütjbaut mobilfunk san diar jo grünjlaagen, huar ham oober noch ei aueraal gud bikomt. Wat sai at CDU an at SPD tu’t digital infrastruktuur? Det finj bialen uk wichtig an sai, dat ham det beeder ütjbau skal, huarbi at CDU de fokus muar üüb a onernemen leit an at digital infrastruktuur muar mä’t wirtskaft ferbünjen woort. Bi’t SPD woort diar üüb henwiset, dat at partei ham uk föl föör Datenschutz iinsaat wal an jo amten an bürgerservice muar digitalisiire wal.

Gans kort tupfaatet haa ik det iindrük füngen, dat bi’t CDU auto an struaten, bi’t SPD muar de ÖPNV uun a madelponkt san, bi bialen jaft at bit üüb Radschnellwege ei föl för wel-ferkiar, oober internet-ütjbau wel’s bialen.

Det as oober bluat en letj dial ütj jo programen. Rekomdiare koon ik jam niks bit üüb saalew ens iin uun a programen (CDU, SPD) tu lukin. Of wan jam det to föl as, fersjük jam doch ens, wat bi’t Wahl-O-Mat ütjkomt. Det jaft at nü ja sogoor üüb friisk.

Und nun noch einmal kurz auf Deutsch

Anlässlich der Landtagswahlen in Schleswig-Holstein und NRW nächsten Monat schaue ich mir in einer kleinen Serie für unsere Rubrik Verkehr & Mobilität an, was die Parteien zu den Themen Verkehr und mobilem Leben vorhaben. Dabei werden alle Parteien berücksichtigt, die aktuell im Landtag Schleswig-Holsteins sind oder nach aktuellen Prognosen Chancen haben, einzuziehen.

Los ging es hier mit CDU und SPD, wo man schon einzelne Schwerpunkte ausmachen konnte. Für die CDU stehen Kfz-Straßenverkehr und Wirtschaft im Vordergrund, während die SPD sich in ihrem Programm mehr dem ÖPNV aus Bus und Bahn widmet. Zum Fahrradverkehr hält die CDU sich kurz, sehr viel mehr hat die SPD aber auch nicht zu sagen. Beide wollen aber in den Ausbau der digitalen Infrastruktur investieren und Land und Stadt besser verknüpfen, auch verkehrsmäßig.

Die Darstellungen hier beziehen sich natürlich nur auf einen kleinen Teil der Programme. Ich empfehle daher, sich auf jeden Fall auch den Rest der Programme (CDU, SPD) anzusehen oder einfach mal zu schauen, was beim Wahl-O-Mat rauskommt.